Naýryz meıramy: 8500-ge jýyq actanalyq ulttyq sport jarystaryna qatysty
ASTANA. KAZINFORM – Naýryz meıramy aıasynda Astana qalasynyń Dene shynyqtyrý jáne sport basqarmasy merekelik sporttyq is-sharalar uıymdastyrdy. Bul týraly Astana qalasy ákimdiginiń baspasóz qyzmeti habarlady.
21-22 naýryz kúnderi elordadaǵy 30 túrli alańda ulttyq sport túrlerinen jarystar ótip, qala turǵyndary men qonaqtaryna dástúrli oıyndardy tamashalaýǵa múmkindik jasaldy.
Eki kúnge sozylǵan saıystarǵa 8500-ge jýyq adam qatysyp, arqan tartys, qazaq kúresi, asyq atý, toǵyzqumalaq, láńgi tebý, qoshqar kóterý sııaqty ulttyq oıyndarda baq synady. Jeńimpazdar arnaıy syılyqtarmen marapattaldy.
Qalalyq sporttyq buqaralyq is-sharalardy ótkizý dırektsııasy basshysynyń orynbasary Erjigit Óserbaıdyń aıtýynsha, elorda turǵyndary men qonaqtarynyń qyzyǵýshylyǵy joǵary boldy. Ásirese dástúrli qoı kóterý saıysy erekshe tartysty ótti.
— Naýryz meıramyna oraı ótkizilgen ulttyq sport jarystary ata-baba dástúrin jańǵyrtyp qana qoımaı, salaýatty ómir saltyn nasıhattaýǵa úles qosty. Eki kúnge sozylǵan saıysqa tek astanalyqtar ǵana emes, Qazaqstannyń basqa qalalarynan kelgen azamattar da belsendi qatysty. Jarystardyń eń kóp kórermen jınaǵan básekesi — qoshqar kóterý saıysy. Bul jarysqa elimizdiń ár óńirinen kelgen qatysýshylar kúsh synasyp, eń myqtylar anyqtaldy, — dedi Erjigit Óserbaı.
Sonymen qatar, qazaq kúresinen ashyq týrnır uıymdastyrylyp, oǵan 700-den astam sportshy qatysty. Balýandar úsh salmaq dárejesinde — 55 kelige deıin, 90 kelige deıin jáne aýyr salmaqta kúsh synasty. Jeńimpazdar baǵaly syılyqtarǵa ıe boldy.
Aıta ketelik 14 naýryzda bastalǵan 10 kúndik «Naýryznamanyń» sońǵy kúni ulttyq ekologııalyq naýqanǵa arnalǵan.