Astanalyq LRT jobasy: Qytaıda oqyǵan 29 operator elge oraldy

ASTANA. KAZINFORM — LRT poıyzdarynyń operatorlaryn daıarlaý baǵdarlamasynyń ekinshi kezeńi aıaqtaldy, dep habarlaıdy CTS kompanııasynyń baspasóz qyzmeti.

29 maman Qytaıdyń Tıantszın qalasynda oqýdan ótip, qorytyndy emtıhandardy sátti tapsyrdy jáne biliktiligin rastaıtyn sertıfıkattar aldy.

Oqytý úsh satyly júıe boıynsha júrgiziledi. Aldymen — Astanadaǵy bazalyq kýrs, odan keıin shetelde tereńdetilgen teorııa, trenajerlarda jumys jáne praktıkalyq taǵylymdama. Sońǵy kezeń — elordadaǵy LRT quramdarynda taǵylymdama, júıeni synaqtan ótkizýge qatysý jáne jelige shyǵý.

Baǵdarlama mamandardy tek poıyz júrgizýge ǵana emes, sonymen qatar qozǵalys qaýipsizdigin qamtamasyz etýge, quramdardy kútip ustaýǵa jáne yqtımal aqaýlardy joıýǵa úıretýge baǵyttalǵan.

Astanadaǵy sabaqtardy Tıantszın metropolıteniniń jáne Chjenchjoý temirjol kásibı-tehnıkalyq ınstıtýtynyń (QHR) oqytýshylary júrgizdi. Praktıkalyq bóligi Tıantszın metropolıteniniń sarapshylarynyń jetekshiligimen ótti. Ol Qytaıdaǵy eń kóne ári iri metropolıtenderdiń biri (1984 jyldan jumys isteıdi, 10 jeli, 300 km astam joly bar).

Qazaqstandyq operatorlar úshin Astananyń klımattyq jáne paıdalaný erekshelikterine beıimdelgen arnaıy sımýlıatsııalyq baǵdarlamalar daıyndaldy. Arnaıy polıgonda tótenshe jaǵdaılar kezindegi is-áreketter jáne praktıkalyq daǵdylar bekitildi.

— Baǵdarlama óte mazmundy boldy. Qytaıda biz zamanaýı tehnologııalarmen tanystyq: kompıýterlik modeldeý, jańa trenajerlar, shynaıy jaǵdaıǵa barynsha jaqyn ortada jumys. Negizgi nazar jolaýshylar qaýipsizdigine, qozǵalystyń birqalyptylyǵyna jáne jaılylyǵyna aýdaryldy, — deıdi 16 jyldan astam tájirıbesi bar temirjolshy, LRT poıyzdarynyń operatory Darhan Qosanov.

LRT poıyzdarynyń operatory Ǵazız Orazǵalıevtiń sózinshe, bul jobaǵa qatysý — onyń tájirıbesindegi jańa kezeń.

— 26 jyldyq temirjol kóligindegi qyzmetimde mashınıst kómekshisinen Almatylyq metropolıtenniń mashınıst-nusqaýshysyna deıingi joldan óttim. Endi LRT aýysyp, jas áriptesterimmen tájirıbe bólisip, jańa tehnologııalardy meńgerip jatyrmyn, — dep atap ótti 

Baǵdarlamaǵa elimizdiń ártúrli óńirlerinen 140 úmitkerdiń ishinen 29 adam irikteldi. Olardyń kópshiligi — temirjolshy áýletteriniń ókilderi.

— Ekinshi kezeń — LRT iske qosýǵa daıyndyqtaǵy mańyzdy qadam. Jeti aıda olar teorııa men praktıkany ótti, alda — Astanadaǵy qorytyndy taǵylymdama. Ol jelidegi jumys, júıeni synaqtan ótkizý jáne paıdalaný jaǵdaıyna barynsha jaqyn jattyǵýlardy qamtıdy. Biz olardyń alǵan bilimderi men daǵdylary qazirgi zamanǵy poıyzdardy tıimdi jáne qaýipsiz basqarýǵa múmkindik beretinine senimdimiz, — dedi «City Transportation Systems» JShS basqarýshy dırektory Baýyrjan Aıthojın.

LRT jobasynyń kelesi kezeńinde Astanada synaqtyq iske qosý jáne jańa quramdardyń kelýi kózdelgen. Búgingi tańda 22,4 km relstik jol tóseldi, 18 stantsııa 80% astam daıyn.

Budan buyrn habarlanǵandaı, elordadaǵy LRT qandaı qosymsha baǵyttarda damıtyny anyqtaldy.