Astanadaǵy LRT-niń baspana naryǵyna áseri: jeli boıyndaǵy páter baǵasy ózgere me
ASTANA. KAZINFORM — Elorda turǵyndary bolashaq LRT jelisiniń boıyndaǵy baspanalarǵa basa nazar aýdara bastady. Jańa kólik júıesiniń iske qosylýyn kútý naryqtaǵy baǵaǵa qazirdiń ózinde áser ete bastaǵan. Osy aýdandardaǵy páterler quny artyp keledi, al sarapshylar aldaǵy ýaqytta baǵa taǵy 20 paıyzǵa deıin kóterilýi múmkin dep boljaıdy. Naryqtaǵy ahýal men satyp alýshylardyń talǵamy qalaı ózgergeni týraly jyljymaıtyn múlik salasynyń mamany Dınara Jaılybaeva aıtyp berdi.
LRT jelisi jaqyn aılarda paıdalanýǵa beriledi dep kútilip otyr.
Sarapshynyń aıtýynsha, baǵyt boıyndaǵy jáne beketterge jaqyn ornalasqan páterlerge suranys qazirdiń ózinde aıtarlyqtaı artqan.
— Satyp alýshylar da, jalǵa alýshylar da LRT jelisiniń mańyndaǵy aýdandardy aldyn ala qarastyryp jatyr. Olar kólik qoljetimdiligi jaqsaryp, iske qosylǵannan keıin jyljymaıtyn múlik quny ósedi dep úmittenedi. Ásirese bolashaq beketterdiń mańynda suranys sońǵy bir-eki jylmen salystyrǵanda joǵary bolyp tur, — deıdi Dınara Jaılybaeva.
Maman mysal retinde «Syǵanaq» beketiniń mańyndaǵy baǵa dınamıkasyn keltirdi. Máselen Syǵanaq kóshesi men Qabanbaı batyr dańǵylynyń qıylysyndaǵy «Pokolenıe bıznes» turǵyn úı keshenindegi eýro eki bólmeli páterdiń quny osy ýaqyt aralyǵynda shamamen 47 mıllıonnan 55 mıllıon teńgege deıin ósken.
Sarapshynyń cózinshe, testileý kezeńinde jeńil relsti kóliktiń shýy joq ekeni baıqalǵan jáne satyp alýshylardyń qyzyǵýshylyǵyna kedergi keltirip otyrǵan joq.
— Jeli boıyndaǵy aýdandarda jyljymaıtyn múlik quny kóteriledi dep boljaımyz, óıtkeni kólik qatynasynyń qolaılylyǵy árqashan lokatsııanyń tartymdylyǵyn arttyrady. Shýǵa qatysty alańdaýshylyq az jáne naryqqa aıtarlyqtaı áser etip otyrǵan joq. Kerisinshe keıbir úı ıeleri baǵanyń taǵy da ósýin kútip, páterlerin qymbatqa satý úshin ádeıi kidirip otyr, — dep atap ótti maman.
Onyń aıtýynsha, naryq qazirdiń ózinde baǵanyń bolashaqtaǵy ósimin esepke alyp úlgergen.
— Ortasha eseppen, eger qazirgi suranys saqtalsa, júıe iske qosylǵannan keıin baǵa birtindep taǵy 10–20 paıyzǵa ósedi dep oılaımyn. Jeltoqsan aıynda bir turǵyn úı kesheninen páter satqan bolatynmyn, qazir ondaǵy baǵa eki esege jýyq kóterildi. Bul LRT mańynda turýdyń qolaıly ári tıimdi bolatynyn kórsetedi, — dedi Dınara Jaılybaeva.
Esterińizge sala keteıik, jeńil relsti kólik júıesin testileý 29 qyrkúıekten beri júrip jatyr. Ony aldaǵy aılarda tolyq iske qosý josparlanyp otyr.
Buǵan deıin poıyzdar saǵatyna 40-50 shaqyrym jyldamdyqpen júretini habarlanǵan bolatyn.
Beketter arasyndaǵy jol júrý ýaqyty 1,5 mınýttan 3 mınýtqa deıin sozylady. Al «Áýejaıdan» sońǵy «Nurly jol» beketine deıingi barlyq 18 stantsııany shamamen 40 mınýtta basyp ótýge bolady.
Jol júrý quny 200 teńge kóleminde bolýy múmkin.
