Astanadaǵy LRT qurylysyna 10 jylda qansha qarjy jumsaldy
ASTANA. KAZINFORM — City Transportation Systems kompanııasy Astanadaǵy LRT qurylysynyń alǵashqy kezeńine bólingen qarjy kólemi týraly málimet berdi.
CTS basqarma tóraǵasy Asylbek Dúısebaevtyń aıtýynsha, 2016 jyly bekitilgen kelisimshartqa sáıkes jobanyń jalpy quny 1,8 mlrd dollardy quraıdy.
— Jobanyń quny 2016 jyly bekitilip, 1,8 mlrd dollar bolyp belgilengen. Búginge deıin joba quny ózgergen joq. Soǵan qaramastan tehnıkalyq sıpattamalar jetildirilip, poıyzdardyń modeli men dızaıny jańartyldy. Sonymen birge LRT jelisi boıynda abattandyrý jumystary júrgizildi, — dedi ol LRT ınfraqurylymyna arnalǵan baspasóz týrynda.
CTS basshysynyń sózinshe, LRT jelisine barlyǵy 19 poıyz qarastyrylǵan. Onyń 15 poıyzy kúndelikti jolaýshy tasymalyna shyǵady, al 4 poıyz rezervte saqtalady.
Bir poıyz quramynyń uzyndyǵy 60 metrdi quraıdy. Al bıiktigi — 3,8 metr, eni — 2,8 metr.
Poıyzdardyń ortasha jyldamdyǵy saǵatyna 60 shaqyrym bolady. Al eń joǵary jyldamdyǵy saǵatyna 80 shaqyrymǵa deıin jetedi.
Aıta keteıik, 12 mamyr kúni LRT vagondary jýrnalısterge tanystyryldy.
Al jolaýshylar úshin jelini 16–17 mamyrda ashý josparlanyp otyr.
