Astanadaǵy LRT-ǵa «Tarlan Astana» ataýy berilýi múmkin
ASTANA. KAZINFORM – Bul týraly elordada qalalyq máslıhattyń kezekten tys sessııasynda Astana qalasynyń Tilderdi damytý jáne muraǵat isi basqarmasy MM basshysynyń mindetin atqarýshy Dosjan Isabek aıtty.
Onyń aıtýynsha, Astana qalasy ákimdigine turǵyndardan, qoǵamdyq uıymdardan jáne Qazaqstan Jazýshylar odaǵy Astana qalalyq fılıalynan elordadaǵy jeńil relsti kólik júıesine (LRT) resmı ataý berý jóninde birqatar usynys kelip túsken.
– Qazirgi tańda LRT qalanyń negizgi qoǵamdyq kólik júıeleriniń birine aınalyp otyr. Degenmen bul ataý tek tehnıkalyq-jobalyq sıpatqa ıe bolǵandyqtan, kúndelikti qoldanysqa yńǵaıly, este saqtalatyn jáne zamanaýı brendtik ataý berý qajet. Halyqaralyq tájirıbede mundaı kólik júıelerine qalanyń mádenıeti men bolmysyn tanytatyn qysqa ári derbes ataýlar berý keń taralǵan. Mysaly, Vankýverdegi SkyTrain, Rıo-de-Janeırodaǵy SuperVia, Reseıdegi «Sapsan» sekildi ataýlar kólik júıesiniń brendine aınalǵan, - dedi ol.
Onyń sózinshe, osyǵan baılanysty 2026 jylǵy 3 maýsymda qalalyq onomastıka komıssııasynyń otyrysynda birneshe nusqa qaralǵan. Olardyń qatarynda «Suńqar», «Lashyn», «Qulan», «Aspan», «Tarlan» jáne basqa da ataýlar usynylǵan.
– Komıssııa músheleri talqylaý qorytyndysy boıynsha Astana LRT jeńil relsti kólik júıesine «Tarlan Astana» ataýyn berý týraly usynysty qoldady. «Tarlan» sózi qazaqtyń tarıhı-mádenı dúnıetanymynda jyldamdyq, erkindik, kúsh-qýat, tektilik jáne senimdilik uǵymdarymen baılanysty, - dedi Dosjan Isabek.
Eske salaıyq, LRT iske qosylǵan alǵashqy eki aptada 1 mıllıon jolaýshyny tasymaldady.
