Astanadaǵy LRT-da bir táýliktegi ortasha jolaýshy aǵyny qandaı
ASTANA. KAZINFORM — Tarlan Astana jeńil relsti kólik júıesi iske qosylǵan sátten beri onyń qyzmetin 8 mln-nan astam jolaýshy paıdalandy. Bul týraly Astana qalasy Qoǵamdyq keńesiniń otyrysynda málim boldy.
- Astana qalasy ákimdiginiń 2022 jylǵy 5 qazandaǵy № 01-2780 qaýlysymen bekitilgen LRT baǵyty Astana qalasynyń halyqaralyq áýejaıyn «Nurly jol» temirjol vokzalymen baılanystyrady. Jeliniń uzyndyǵy 22,4 shaqyrym, 18 stantsııa qarastyrylǵan, jyljymaly quram 15 vagonnan turady. Bir reıstiń tolyq aınalym uzaqtyǵy – 95 mınýt. Qazirgi ýaqytta táýligine ortasha jolaýshylar aǵyny shamamen 73 myń jolaýshyny quraıdy, - dedi Astana qalasynyń Kólik jáne jol - kólik ınfraqurylymyn damytý basqarmasy basshysy orynbasarynyń mindetin atqarýshy Madııar Tuqpatov.
Onyń aıtýynsha, iske qosylǵan sátten bastap LRT arqyly 8 mln-nan astam jolaýshy tasymaldandy. Jyl aıaǵyna deıin tasymaldanǵan jolaýshylar sany 10 mln-nan asýy múmkin.
Eske salsaq, 16 mamyrda Prezıdent Astana LRT jumysyn iske qosty. https://kaz.inform.kz/news/prezident-astana-lrt-zhumisin-ske-kosti-279bb8ff
Aıta keteıik, bıyl jazda Astanadaǵy LRT-ge resmı túrde Tarlan Astana ataýy berildi.
Astanadan Qosshyǵa deıingi LRT jelisiniń qurylysy 2027 jyly aıaqtalmaq.
