Astanadaǵy kúres túrlerinen álem chempıonatynda el quramasynan búgin kimder shyǵady
ASTANA. KAZINFORM - Astanada ótetin álem chempıonatynda búgin, 24 qazanda el quramasynan grek-rım kúresinen qazaqstandyq 4 balýan bozkilemge shyǵady.
Álemniń úzdik balýandary bas qosatyn dúbirli doda elordadaǵy «Barys Arena» sport kesheninde bolady. Bul – bıyl Qazaqstan qabyldaıtyn olımpıadalyq sport túrleri boıynsha álemdik deńgeıdegi eń iri jarystyń biri.
Álemdik dodany grek-rım kúresiniń sheberleri bastaıdy.
24 qazan
55 keli. Ishar Kýrbaev - Kagetora Okamoto (Japonııa)
60 keli. Aıdos Sultanǵalı jarysty birden 1/8 fınaldan bastaıdy. Qarsylasy irikteý kezeńinen keıin anyqtalady.
77 keli. Mereı Máýlitqanov - Hen Chjın Kan (Ońtústik Koreıa)
82 keli. Ibragım Magomadov - Lýka Darıotstsı (Italııa)
Beldesýler Astana ýaqytymen saǵat 10:30-da bastalady. Jartylaı fınaldyq kezdesýler 19:00-ge josparlanǵan.
Aıta keteıik, Astana 2019 jyly da kúresten álem chempıonatyn qabyldaǵan edi. Araǵa jeti jyl salyp, álemdik doda qaıtadan elordaǵa oralyp otyr. Bul elimizdiń iri halyqaralyq jarystardy ótkizý tájirıbesin arttyryp qana qoımaı, otandyq kúrestiń damýyna jáne jas sportshylardyń osy sport túrine qyzyǵýshylyǵyn kúsheıtýge yqpal etedi.
Toǵyz kúnge sozylatyn chempıonatqa álemniń 135 elinen 900-den astam balýan qatysady dep kútilip otyr. Olardyń qatarynda Olımpıada chempıondary, álem birinshilikteriniń jeńimpazdary men júldegerleri bar.
