Astanadaǵy konteıner jarylysyna baılanysty qylmystyq is qozǵaldy
ASTANA. KAZINFORM - «Astana» stantsııasynyń suryptaý parkiniń 12-shi jolynda poıyzben jetkizilgen konteınerde jarylys boldy.
Saldarynan bir adam jeńil qol jaraqatyn alǵan. Kóz jumǵandar joq. Jolaýshylar men jaqyn mańdaǵy turǵyndarǵa da qaýip tónip turǵan joq.
Atalǵan fakti boıynsha Kóliktegi polıtsııa departamenti «Temirjol kóligin paıdalaný nemese qozǵalys qaýipsizdigi erejelerin buzý» baby boıynsha qylmystyq is qozǵady.
— Oqıǵa ornyna departament basshylyǵy dereý jetti. Barlyq mán-jaıdy anyqtaý úshin arnaıy jedel top quryldy. Qazirgi ýaqytta tergeý júrgizilip jatyr. Oqıǵanyń sebepteri men barlyq mán-jaıy anyqtalýda, - dedi QR ІІM Kóliktegi polıtsııa departamenti bastyǵynyń orynbasary Málik Qaıbar.
Buǵan deıin tótenshe oqıǵaǵa qatysty «Qazaqstan Temirjoly» ulttyq kompanııasy baspasóz qyzmeti resmı habarlama taratty.