Elordada kommýnaldyq qyzmetter kúsheıtilgen jumys rejımine kóshti

ASTANA. KAZINFORM – Elordada aýa raıyna baılanysty qaladaǵy kommýnaldyq qyzmetter táýlik boıy kúsheıtilgen rejımde jumysyn jalǵastyryp jatyr, dep habarlaıdy elorda ákimdiginiń resmı saıty.

Tańerteń kóshe men joldardy tazalaýǵa 3 000-ǵa jýyq jol jumysshysy jáne 1 400-den astam arnaıy tehnıka jumyldyryldy.

Qys mezgiliniń basynan bastap qaladan qar polıgondaryna 1 376 655 tekshe metrden astam qar 105 413 aýyr júk reısimen shyǵaryldy.

Qala turǵyndarynyń qaýipsiz qozǵalysyn qamtamasyz etý úshin jolǵa, trotýarlar men kóshelerge tuz sebiledi. Qys mezgiliniń basynan beri 4 000 tonnaǵa jýyq kóktaıǵaqqa qarsy materıal paıdalanyldy. Jumystar táýlik boıy júrgiziledi.

Aıta keteıik, «Qazgıdromet» RMK málimetinshe, elordada 2025 jyldyń sońǵy kúni men 2026 jyldyń basynda mynandaı aýa raıy boljanyp otyr:

31 jeltoqsan — kóshpeli bult, túnde qar, kúndiz jaýyn-shashyn, keı jerlerde qatty (jańbyr, qar), boran, tuman jáne kóktaıǵaq. Jel ońtústik-batystan soltústik-shyǵysqa aýysady, jel 9-14 m/s, kúndiz jeldiń ekpini — 15-20 m/s deıin. Túnde aýa temperatýrasy-4-6°S, kúndiz -1 + 1°S.

1 qańtar — kóshpeli bult, túnde qar, boran, kóktaıǵaq. Ońtústik-batystan 9-14 m/s jel soǵady, aýa temperatýrasy túnde-10-12°S, kúndiz-7-9°S.

2 qańtar — kún bultty, jaýyn-shashynsyz. Ońtústik-shyǵys jel 5-10 m/s, aýa temperatýrasy túnde-14-16°S, kúndiz-4-6°S.

Astana ákimdigi qala turǵyndary men qonaqtaryn qaýipsizdik erejelerin saqtaýǵa, joldar men trotýarlarda muqııat bolýǵa, sondaı-aq qolaısyz aýa raıy jaǵdaıynda alys saparlarǵa shyqpaýǵa shaqyrady.

Eske sala ketsek, osyǵan deıin 31 jeltoqsanda aýa raıy qandaı bolatynyn jazǵan edik.