Astanadaǵy kólik keptelisin azaıtý: qala kóshelerin tazartý tártibi ózgermek
ASTANA. KAZINFORM — Búgin Astana qalasy Qoǵamdyq keńesiniń otyrysynda elorda aýmaǵyn abattandyrý qaǵıdasy qaraldy.
- Tazalyq jumystaryn atqaratyn merdiger uıymdar brýschatkanyń, jasyl jelektiń, kóshedegi jabdyqtar men jaryqtandyrý júıelerin saqtaýǵa materıaldyq jaýapty bolady. Salmaǵy 3,5 tonnadan asatyn aýyr arnaıy tehnıkanyń brýschatka tóselgen trotýarlarǵa, jaıaý júrginshiler aımaqtaryna jáne avtobýs aıaldamalaryna shyǵýyna tyıym salý eskerilgen, - dedi Astana qalasynyń Kommýnaldyq sharýashylyq basqarmasynyń basshysy Erlan Syzdyqov.
Onyń aıtýynsha, qysta balalardyń oıyn jáne sport alańdarynan qar tehnıkamen emes, qolmen tazartylady.
Sonymen qatar, jańa erejede kúndizgi qarbalas ýaqytta (tańerteńgi, túski jáne keshki ýaqytta jolda kólik kóbeıgen kezde), ıaǵnı kólik keptelisi kóbeıetin kezeńde joldy mehanıkalandyrylǵan tártipte tazalaýǵa tyıym salý usynyldy. Munymen qosa, arnaıy tehnıkamen kúndiz jol jıegindegi jasyl jelekterdi sýarýǵa tyıym salynady. Bul turǵyda sýarý jumystary bekitilgen kestege sáıkes júzege asyrylady.
Atap aıtqanda, jańa redaktsııadaǵy ereje áli de talqylaý kezeńinde.
Budan buryn habarlanǵandaı, elorda ákimdigi eki deńgeıli jolaıryq salý jobasyna qatysty túsinik berdi.
