Astanadaǵy kólik keptelisi máselesi óte ózekti bolyp tur – Memleket basshysy
ASTANA. KAZINFORM — Elorda ákimi tııanaqty jumys istep otyr. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti.
- Astanada qordalanǵan máselelerdi sheshý jáne qalany abattandyrý úshin kóp jumys atqarylyp jatyr. Bárimiz kýámiz. Jalpy, qala ákiminiń tıisti qabileti bar, tııanaqty jumys istep otyr. Degenmen, Astanada kólik keptelisi máselesi óte ózekti bolyp tur. Sondyqtan osy baǵytta shuǵyl sharalar men sheshimder qabyldaý qajet, - dedi Qasym-Jomart Toqaev.
Sonymen qatar Prezıdent taǵy bir mańyzdy mindet retinde turmystyq qaldyqtardy óńdeıtin kásiporyndar salý kerek ekenin atap ótti.
- Bul másele tek elordaǵa emes, barlyq oblystardyń basty qalalaryna qatysty. Salynyp jatqan turǵyn úılerdiń sapasy, jerasty kommýnıkatsııalarynyń qurylysy jáne jóndeý jumystary basty nazarda bolýy qajet, - dedi Memleket basshysy.
Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.
Memleket basshysy 2024 jyldy elimiz oń kórsetkishtermen aıaqtaǵanyn aıtty.