Astanadaǵy kólik keptelisi 10 balǵa jetti
ASTANA. KAZINFORM — Bas shaharǵa jaýǵan qalyń qar kólik qozǵalysyna áserin tıgizbeı qoıǵan joq. 2GIS qosymshasyndaǵy kartada qalanyń barlyq negizgi kóshelerinde keptelistiń 10 balǵa jetkeni ańǵaryldy.
2GIS málimetine sáıkes, qalanyń barlyq negizgi kósheleri «qyzyl» jáne tipti «qoıý qyzyl» túspen belgilengen. Ásirese qozǵalys Saraıshyq, Qabanbaı batyr, Respýblıka, Turan, Kenesary, Syǵanaq, Aqmeshit jáne basqa baǵyttarda tolyq toqtap qaldy deýge bolady.
Aýa raıynyń qolaısyzdyǵy joldaǵy qozǵalysty edáýir ýshyqtyrdy.
Sınoptıkterdiń boljamyna saı, respýblıka aýmaǵy Atlant muhıtynan keletin tsıklonnyń áserinde bolatyndyqtan, elimizdiń basym bóliginde jańbyr men jel kúsheıetinin aldyn-ala eskertilgen bolatyn. Qazaqstannyń kóp bóliginde qar jaýyp tur; shyǵysta jáne ońtústik-shyǵystyń taýly aımaqtarynda qar qatty; ońtústik-shyǵysta jańbyr men qar túrinde jaýyn-shashyn kútiledi. Respýblıka boıynsha jel kúsheıip, boran, tuman jáne qatqaq bolatyny boljanǵan.
Búgin elimizdiń birqatar óńirinde qolaısyz aýa raıy saqtalady. Birneshe oblysta tuman túsip, kóktaıǵaq pen burqasyn boljanǵan. Keı jerlerde jeldiń ekpini 25 m/s-qa deıin jetýi múmkin.