Qutqarýshylar Astanadaǵy qoqys polıgonyndaǵy órt qalaı sóndirilgenin kórsetti
ASTANA. KAZINFORM — Astana qalasy Baıqońyr aýdanynda ornalasqan qatty turmystyq qaldyqtar polıgonyndaǵy órt tolyq sóndirildi.
Oqıǵa ornynda is-qımyldy úılestirý maqsatynda Qazaqstan Respýblıkasy Tótenshe jaǵdaılar mınıstrliginiń basshylyǵymen jedel shtab quryldy.
Órtti sóndirý jumystary táýlik boıy úzdiksiz júrgizildi. Órtti tıimdi sóndirýdi uıymdastyrý úshin TJM-niń kúshteri men quraldary jumyldyryldy.
— Sonymen qatar polıgon aýmaǵyn ınertti materıalmen jabý boıynsha ınjenerlik jumystar júrgizildi. Osy maqsatta Astana qalasy ákimdigi ınjenerlik jáne qurylys tehnıkasynyń jumysyn qamtamasyz etip, topyraqty jetkizý úzdiksiz uıymdastyryldy. Jalpy polıgonǵa 15 myń tonnaǵa jýyq ınertti materıal jetkizilip, paıdalanyldy. Bul polıgon aýmaǵyn barynsha tolyq jabýǵa, janý oshaqtaryn oqshaýlaýǵa jáne órttiń qaıta taralýyna jol bermeýge múmkindik berdi, — delingen habarlamada.
TJM bólimsheleri men Astana qalasy ákimdiginiń birlesken jumysynyń nátıjesinde 3 gektar aýmaqty sharpyǵan órt tolyq sóndirildi.
Buǵan deıin Baıqońyr aýdany Alash tas jolynyń boıynda ornalasqan qatty turmystyq qaldyqtar polıgony aýmaǵynda qoqys órtke oranǵanyn jazǵanbyz.
