Astanadaǵy «Kesteli oramal» kontsertinde soǵys jyldarynyń ánderi shyrqaldy
ASTANA. KAZINFORM — Otan qorǵaýshylar kúnine oraı elordadaǵy E. Rahmadıev atyndaǵy memlekettik akademııalyq fılarmonııa sahnasynda «Kesteli oramal» atty merekelik kontsert ótti.
Kesh barysynda kórermenderge halyqtyń ótken ǵasyrdaǵy tarıhy, soǵys jyldaryndaǵy rýhanı beriktigi men beıbit ómirdiń qadiri óner arqyly kórsetildi.
Keshtiń ereksheligi — shyǵarmalardyń mádenıet qaıratkeri Sholpan Qorǵanbek jetekshilik etetin «Qorqyt» etno-ansambliniń jandy súıemeldeýimen oryndalýy.
Qazaqtyń dástúrli aspaptarynyń úni men soǵys jyldaryndaǵy ánderdiń úılesimi kópshilikke tanys týyndylardy jańa qyrynan tanytty.
Kontsertte soǵys jyldaryndaǵy qazaq shyǵarmalary — «Batyr Baýyrjan», «Jas qazaq», «Ana týraly ballada», «Álııa», sondaı-aq keńestik kezeńnen keń tanylǵan «Sınıı platochek», qazaq tilindegi «Katıýsha», «Smýglıanka», «Temnaıa noch» jáne «Jýravlı» ánderi oryndaldy.
Sahnada Qazaqstannyń eńbek sińirgen qaıratkerleri Svetlana Aıtbaeva, Estaı Muqashev, Gúlnur Orazymbetova, Araılym Rahymqyzy, halyqaralyq baıqaýlardyń laýreattary Aıdyn Jumabaev, Parasat Otan, Dıana Maeva, Qymbat Jambylbek, «Daryn» syılyǵynyń laýreattary Muratbek Haırolda men Aqbota Qusnadın, sondaı-aq Qazaqstan daýysy jobasynyń jeńimpazy Quralaı Meırambek óner kórsetti.
Baǵdarlamanyń ıdeıalyq jetekshisi, fılarmonııanyń estradalyq vokal bóliminiń kórkemdik jetekshisi Dana Sataeva kontsert án arqyly jetetin tarıhı keshke aınalǵanyn aıtty. Kesh ataýy soǵys jyldary jazylǵan kórnekti kompozıtor Muqan Tólebaevtyń osy attas shyǵarmasynan alynǵan.
«Keshtiń ataýyna aınalǵan „Kesteli oramal“ áni maıdanǵa attanǵan jaýyngerlerdiń otbasymen uzaq ýaqyt habarsyz qalǵan kezeńin beıneleıdi. Olar hat jazyp, onyń jaqyndaryna jetetin-jetpeıtinin bilmese de, ár jolyna saǵynysh pen júrek jylýyn syılady. Osy eki sózdiń ózinde úlken náziktik pen mahabbat jatyr. Sondyqtan mundaı ánderdi jastar bilýi jáne este saqtaýy kerek.
Óıtkeni bul týyndylarda beıbit aspan úshin ómirin qıǵan jandardyń rýhy saqtalǵan», — dedi Dana Sataeva.
Bul kontsertti elordalyq fılarmonııa dástúrli túrde uıymdastyryp keledi.
Aıta ketelik Astanada Otan qorǵaýshy kúnine arnalǵan kontsert ótken edi.
