Astanadaǵy keptelisten turǵyndar dittegen jerine ýaqtyly jete almaı tur
ASTANA. KAZINFORM – Búgin tańerteń elordada aýqymdy kólik keptelisi bastaldy. Osyǵan oraı agenttik tilshisi qalanyń qaı kósheleriniń jabyq ekenin anyqtap kórdi.
Astana ákimdiginiń dereginshe, búginde sol jaǵalaýdaǵy joldardy ortasha jóndeýge qatysty ahýal mynadaı:
Saraıshyq kóshesi B.Momyshuly dańǵylynan Turan dańǵylyna deıin joldyń ústingúń jabynyn tóseý úshin tolyq jabyq. Jónde jumystaryn 17 maýsym kúni saǵat 6:00-de aıaqtaý josparlanǵan.
Qabanbaı batyr men Uly dala dańǵyldarynyń qıylysy da jabyq tur. Bul aralyqtaǵy jóndeý jumystary búgin keshki saǵat 23:00-ge qaraı aıaqtalady.
Qabanbaı batyr dańǵylynyń Uly dala men Hýseı ben Talal kóshesine deıingi aralyǵynda da kólik júre almaıdy. Bul ýchaskedegi de jóndeý jumystary búgin keshke bitedi.
Ákimdik Máńgilik el dańǵyly jaqtan Maral kópiriniń joly da jabyq turǵanyn eskertedi. Qazirgi ýaqytta Táýelsizdik kópirimen kólik qatynap jatyr.
«Bıyl jol ınfraqurylymyna basymdyq beriledi. Soǵan oraı osy jyly joldardy salý jáne jóndeý jumystarynyń kólemi artady. Bul rette klımattyq aýa raıy jaǵdaıyn eskerer bolsaq, jol jóndeý maýsymynyń qysqa ekendigin atap ótemiz. Sol sebepti jolshylar birden birneshe kósheni jóndep jatyr. Degenmen, jol qozǵalysy da eskeriledi. Jumystardyń bóligi aıaqtaldy», - dep atap ótedi ákimdiktiń baspasóz qyzmeti.
Esterińizge sala keteıik, mamyr aıynyń basynan Astanada aýqymdy jol jóndeý maýsymy bastaldy. Elorda ákimdigi qazan aıyna deıin 51 kósheni jóndemek. Josparǵa sáıkes, jol jabynyn ortasha jóndeý jalpy uzyndyǵy 53,8 shaqyrymdy quraıtyn 51 kóshede júrgizilip jatyr.
