Astanadaǵy Keleshek mektebinde «Alaqan» júıesi iske qosyldy

ASTANA. KAZINFORM — Astana qalasyndaǵy №113 jalpy orta «Keleshek» mektebinde ınnovatsııalyq bıometrııalyq júıe iske qosyldy. Bul týraly elorda ákimdiginiń baspasóz qyzmeti habarlady. 

Bul — oqýshylardyń qaýipsizdigin qamtamasyz etý jáne oqý protsesin tıimdi uıymdastyrý maqsatynda engizilgen jańa tehnologııanyń bir túri.

«Alaqan» júıesi mektepke kirý, shyǵý jáne ashanaǵa kirýdi baqylaýdyń jańa tásili retinde quryldy. Bul júıe oqýshylardyń alaqandaryn skanerleý arqyly jumys isteıdi. Ár oqýshynyń alaqan sıpaty arnaıy tsıfrlyq júıege tirkeledi, jáne olar mektepke kirip-shyǵý kezinde nemese ashanaǵa kirgende, tek alaqandary arqyly ǵana tirkelip ótedi. Bul ádis oqýshylardyń qaýipsizdigin arttyryp, mektep aýmaǵynda tártipti saqtaý úshin mańyzdy qadam.

— Bul júıeniń artyqshylyǵy — balalardyń jeke tulǵasyn saqtaý. Oqýshylardyń bet beınesi túsirilmeıdi, tek alaqany arqyly ǵana mektepke kirip-shyǵa alady. Bul ádis balalardyń qaýipsizdigin qamtamasyz etýge múmkindik beredi jáne bizge tehnologııanyń zamanaýı talaptaryna saı jumys isteýge jol ashady, — deıdi mektep dırektory Saýle Qaıyrbekqyzy.

Aıta keteıik, bul júıe oqýshylardyń mektepke kirý ýaqytyn naqty tirkep, olardyń qaýipsizdigin qadaǵalaýǵa múmkindik beredi.

Ata-analar júıe arqyly qashyqtan oqýshylardyń mektepke kirip-shyǵýyn baqylaı alady. Olarǵa oqýshylardyń qansha ýaqytta mektepten shyqqany týraly aqparat usynylady, bul ata-analardyń balalaryn baqylap otyrýyna múmkindik beredi. 

Aıta ketelik Alaqan, CEREBRA, Parqour – Shetelge tanylǵan qazaqstandyq IT-jobalar týraly jazǵan edik.