Astanadaǵy «Qazaqstan» sport kesheniniń qurylysy qashan aıaqtalatyny aıtyldy
ASTANA. KAZINFORM — 2018 jyldyń tamyzynda «Qazaqstan» sport keshenindegi basseın jóndeýge jabylyp, 2019 jyldyń sáýirinde sport nysany tolyǵymen jumysyn toqtatqan edi.
Májilis depýtattarynyń halyqpen kezdesý aıasynda depýtat Dáýlet Turlyhanov Astana qalasyndaǵy birneshe áleýmettik jáne ınfraqurylymdyq nysandardy aralap, turǵyndardyń jaı-kúıimen tanysty.
Osyndaı kezdesýlerdiń biri Almaty aýdanyndaǵy «Qazaqstan» sport kesheniniń jaǵdaıyn zerdeleýge arnaldy. Bul kezdesý turǵyndardyń ótinishi boıynsha uıymdastyryldy.
Aıta ketý kerek, «Qazaqstan» sport kesheni alǵash ret 2001 jyly naýryz aıynda ashylǵan. 2007 jyly bul keshen «Barys» hokkeı klýbynyń Qurlyqtyq hokkeı lıgasyna (QHL) qatysýyna baılanysty qaıta jóndeýden ótti jáne «Barys» HK-nyń negizgi arenasy retinde paıdalanyldy. Alaıda, 2018 jyldyń tamyzynda keshendegi basseın jóndeýge jabylyp, 2019 jyldyń sáýirinde sport nysany tolyǵymen jumysyn toqtatqan.
Tolyq tehnıkalyq tekseristiń nátıjesinde ǵımarat apatty jaǵdaıda dep tanylǵan. Osyǵan oraı, sport keshenin qalpyna keltirý qajettigi týyndap otyr.
«Astana qalasynyń Qurylys basqarmasy» memlekettik mekemesiniń basshysy Tólegen Qulushevtyń málimetinshe, sport keshenine qatysty jobalyq-smetalyq qujattama 2025 jyldyń naýryz-sáýir aılarynda daıyn bolmaq. Osydan keıin qurylys-montajdaý jumystary bastalady dep josparlanýda. Tolyq qaıta jańartý jumystary 2026 jyly aıaqtalady.
Dáýlet Turlyhanov óz sózinde bul sport keshenin qalpyna keltirýdiń Astana qalasy úshin mańyzdy ekenin atap ótti.
— Bul sport keshenin qaıta jańartý turǵyndardyń belsendi ómir saltyna jáne qalanyń sporttyq ınfraqurylymyn damytýǵa oń yqpal etedi. Bul — tek sportshylar úshin ǵana emes, búkil qala turǵyndary úshin mańyzdy nysan. Sport keshenin qalpyna keltirý jumystary Astana qalasynyń sporttyq áleýetin arttyrýǵa jáne turǵyndardyń densaýlyǵyn jaqsartýǵa baǵyttalǵan mańyzdy joba bolmaq. Halyqtyń usynys-tilekteri men depýtattardyń baqylaýy bul jumystyń sapaly oryndalýyna yqpal etedi, — dedi depýtat.
Eske salsaq, osyǵan deıin Dáýlet Turlyhanov elimizde sport salasynda qandaı kemshilikter bar ekenin aıtty.