Astanadaǵy hostelderde órt qaýipsizdigi saqtala ma
ASTANA. KAZINFORM – Elordadaǵy hostelderde órt qaýipsizdigine tekseris júrgizildi. Bul týraly Astana ákimdiginiń resmı saıty jazdy.
Tekseristi uıymdastyrýshylardyń aıtýynsha, bul baǵyttaǵy jumys 18 qańtardan bastalǵan. Búginge deıin 78 nysannyń órt qaýipsizdigi erejelerine sáıkestigine tekseris júrgizildi. Osyndaı taǵy 9 hostelde jumystar jalǵasyp jatyr.
«Astana qalasy Tótenshe jaǵdaılar departamenti hostelderde jospardan tys tekserister júrgizip jatyr. Tekseris nátıjeleri boıynsha 377 órt qaýipsizdigin saqtamaý faktisi anyqtaldy. Onyń ishinde nysandardaǵy shyǵý joldarynyń jabyq bolýy, terezelerge temir torlar ornatylýy, órt qaýipsizdigi quraldarynyń joqtyǵy, dabyl júıeleriniń durys jolǵa qoıylmaýy sııaqty kemshilikter jıi kezdesti. Órt qaýipsizdigin saqtamaǵan nysan ıeleri ákimshilik jazaǵa tartylyp, olarǵa erejeni buzý faktilerin joıý týraly uıǵarym tapsyrylatyn bolady», - dedi Astana qalasy Tótenshe jaǵdaılar departamenti memlekettik órt baqylaý basqarmasynyń bastyǵy Madııar Myrzageldıev.
Onyń aıtýynsha, qala boıynsha 107 hostel ornalasqan, onyń 22-si óz erkimen jumysyn toqtatqan. Tekserý jumystary jalǵasyn tabady.
Budan basqa qala boıynsha oıyn-saýyq ortalyqtarynda «Qaýipsiz saýda» atty oqý-jattyǵý jumystary júrgizilip jatyr.
