Astanadaǵy gastrol Qazaqstanmen mádenı almasýdyń bastaýy bolady — Koreı ulttyq baleti
ASTANA. KAZINFORM — Koreı ulttyq baleti Qazaqstandaǵy alǵashqy gastroli aıasynda elorda sahnasynda «Korsar» baletin usyndy. Eki saǵatqa jýyq spektaklde klassıkalyq týyndynyń koreı horeografy Son Chonbın qaıta paıymdaǵan nusqasy kórsetiledi.
Koreı ulttyq baletiniń kórkemdik jetekshisi ári bas dırektory Kım Djývon gastroldiń máni, koreı baletiniń ereksheligi jáne eki el arasyndaǵy mádenı baılanysty damytý perspektıvalary týraly aıtyp berdi.
— Astanadaǵy bul gastrol Qazaqstan men Koreıa arasyndaǵy klassıkalyq balet salasyndaǵy jemisti mádenı almasýdyń bastaýy bolady dep úmittenemin, — dedi Kım Djývon.
Kım Djývonnyń aıtýynsha, Koreı ulttyq baletiniń Qazaqstandaǵy alǵashqy gastroline «Korsar» spektakliniń tańdalýy kezdeısoq emes. Qazirgi tańda bul álemdik klassıkalyq repertýardaǵy kóp qoıyla bermeıtin týyndylardyń biri.
— «Korsar» — álemdik klassıkalyq repertýardyń bir bóligi bolǵanymen, qazirgi kezde jıi qoıyla bermeıtin shyǵarma. Biz túpnusqadaǵy úsh aktili baletti eki aktili qoıylymǵa beıimdedik. Horeograf Son Chonbınniń qaıta paıymdaýynan keıin spektakl qurylymy anaǵurlym áserli ári dınamıkalyq sıpat aldy, kórermenge usynylatyn sahnalyq elementter de kóbeıdi, — dedi ol.
Kórkemdik jetekshiniń sózinshe, spektakldiń negizgi ózeginde dostyq, mahabbat jáne adam bolmysynyń mánin túsinýge umtylý sekildi taqyryptar jatyr. Bul ıdeıalar ýaqyt pen mádenı shekaraǵa qaramastan kez kelgen kórermenge jaqyn.
Koreı ulttyq baletiniń tarıhy 70 jylǵa jýyq ýaqytty qamtıdy. Osy kezeńde trýppa eýropalyq klassıkalyq balet dástúrlerin, álemdegi jetekshi balet mektepteriniń ádistemesin jáne keń aýqymdy repertýardy birtindep meńgerdi. Kım Djývonnyń aıtýynsha, 1990-2000 jyldardaǵy damý kezeńderinen ótip, teatr búginde koreı ártisteriniń fızıkalyq ereksheligi men emotsıonaldyq bolmysyna úılesetin ózindik stılin qalyptastyrǵan.
— Búginde teatr ózine tán rýhanı erekshelikti kórsetetin, koreı mádenıetiniń qaıtalanbas bolmysyn jetkizetin tól qoıylymdar jasaı alatyn deńgeıge jetti, — dedi Kım Djývon.
Koreı ulttyq baletiniń kórkemdik jetekshisi eldegi klassıkalyq balettiń tanymaldyǵyna qatysty másele búginde ózekti emes ekenin atap ótti. Onyń aıtýynsha, teatr qoıylymdary turaqty túrde anshlagpen ótedi, al zaldardyń ortasha tolymdylyǵy 99 paıyzdan asady.
Koreı baletiniń halyqaralyq arenaǵa shyǵýyna sońǵy jyldary álemdik deńgeıde tanylǵan «Koreı tolqyny» — hallıý de jańa múmkindikter ashyp otyr. K-pop, kıno jáne serıaldar arqyly koreı mádenıetine degen qyzyǵýshylyqtyń artýy ulttyq balettiń de sheteldik aýdıtorııaǵa tanylýyna yqpal etýde.
— Biz aldaǵy ýaqytta da balet ónerine úırene otyryp, yntymaqtastyqqa úmittimiz. Qazaqstan baleti qazaq halqynyń tamasha rýhy men jan dúnıesin kórsetedi. Onyń koreı baletimen ózara baılanysy odan ári jalǵasady dep senemin, — dedi Kım Djývon.
Aıta keteıik, buǵan deıin, Kım Djývon Jibek Joly telearnasynyń «Búgin.LIVE» baǵdarlamasynda suhbat bergen edi.
