Astanadaǵy feldsher qazasy: Úıdiń apatty jaǵdaıy týraly ótinish túspegen
ASTANA. KAZINFORM — Astanada feldsher Uldana Myrzýannyń qazasyna qatysty sot otyrysy jalǵasyp jatyr. Sotta elordalyq Turǵyn úı jáne turǵyn úı ınspektsııasy basqarmasynyń tehnıkalyq bóliminiń basshysy Erbol Ahmetov jaýap berdi.
Spıker turǵyn úı ınspektsııasy barlyq kóppáterli úıdiń qasbetin kún saıyn kózben sholyp tekserýge mindetti emes ekenin eske saldy. Baqylaý josparly nemese jospardan tys júrgiziledi. Onyń ishinde turǵyndardan nemese PIK tóraǵalarynan ótinish túsken jaǵdaıda tekserý uıymdastyrylady.
Mamannyń aıtýynsha, turǵyn úı ınspektsııasy turǵyn úı qoryn kútip ustaý, paıdalaný jáne jóndeý máselelerin baqylaıdy, sondaı-aq ortaq múliktiń tehnıkalyq jaǵdaıyn tekseredi.
Erbol Ahmetovtiń aıtýynsha, qasbet qulaǵanǵa deıin Táýelsizdik dańǵyly, 24B mekenjaıyndaǵy úıdiń PIK tarapynan tehnıkalyq nemese apatty jaǵdaı, qasbetti jóndeý qajettiligi ne tehnıkalyq tekserý júrgizý týraly eshqandaı ótinish túspegen.
Al qasbet qulaǵan soń aýdan ákimdigi turǵyndardyń qaýipsizdigin qamtamasyz etý úshin birqatar shara uıymdastyrǵan. Onyń ishinde qaýipti konstrýktsııalardy bekitý jumystary júrgizilgen.
Mamannyń aıtýynsha, ortaq múlikti tıisti deńgeıde kútip ustaýǵa kondomınıým nysanyn basqarý organdary, sonyń ishinde PIK tóraǵalary tikeleı jaýap beredi. Aqaý anyqtalǵan jaǵdaıda qajetti sharalardy, onyń ishinde josparly nemese kúrdeli jóndeý jumystaryn uıymdastyrý da basqarý organdarynyń mindeti.
Erbol Ahmetov 2017 jyly úıge tehnıkalyq tekserý júrgizilgenin de rastady. Onyń túsindirýinshe, sol kezde ǵımarattyń tozý deńgeıi 31% dep baǵalanyp, jaǵdaıy qanaǵattanarlyq dep tanylǵan. Oǵan qosa, tıisti usynymdar berilgen.
Mamannyń aıtýynsha, bul usynymdardyń oryndalýyn baqylaý eń aldymen PIK tóraǵasy men menshik ıeleri birlestiginiń mindetine jatady. Bul rette tekserý qorytyndysynda kórsetilgen usynymdar mindetti emes, usynymdyq sıpatta bolǵan.
Ol tehnıkalyq tekserý júrgizý tártibine de toqtaldy. Aldymen aýdan ákimdikteri vızýaldy tekserý júrgizip, tehnıkalyq tekserýdi qajet etetin úılerdi anyqtaıdy. Keıin memlekettik satyp alý arqyly akkredıttelgen uıym tańdalady. Atalǵan uıym tehnıkalyq tekserý júrgizip, qorytyndynyń eki danasyn usynady. Tıisti jumystardy turǵyndarmen júrgizý úshin qujattar «Órken qala» vedomstvolyq baǵynysty uıymyna beriledi.
Eske salaıyq, Uldana Myrzýan jedel járdem feldsheri bolyp qyzmettik mindetin atqarý kezinde kópqabatty úıdiń qasbeti qulap, qaza tapqan. Osy fakti boıynsha Astana sotynda qylmystyq is qaralyp jatyr.
Sot otyrysynda marqum feldsherdiń jubaıy Ádilet Zeınel áıelimen ótken sońǵy saǵattar týraly aıtyp bergen edi.
Sondaı-aq, Á. Zeınel Astana ákimdiginen alǵan 20 mln teńgeni qaıda jumsaǵanyn túsindirdi.
Buǵan deıin úı turǵyndary sotta jaýap berip, PIK tóraǵasynyń qalaı jumys istegenin aıtyp bergen edi.
2026 jylǵy 26 aqpandaǵy qorytyndyda úı apat aldyndaǵy jaǵdaıda dep tanylyp, oǵan tórtinshi dáreje berilgen.
