Astanadaǵy Esil ózeninde sý deńgeıi qalypty – fotoreportaj
ASTANA. KAZINFORM – Kópten kútken kóktem Astanaǵa da keldi. Biraq qar erigen soń Esil ózeni jaǵalaýynda sýdyń ulǵaıýy baıqaldy. Kazinform fototilshisi sý basqan jaǵalaý men joldardy sýretke túsirip qaıtty.
Ótken aptada kúnniń kúrt jylynýyna baılanysty laı men batpaqty kezeń uzaqqa sozylmady. Degenmen keı jerlerde áli de kúrtik qar bar.
Esil ózenindegi muz da tolyǵymen eridi, al sý jaǵadaǵy jaıaý júrginshiler jolyna jaıyldy.
Trıatlon saıabaǵy janyndaǵy jaǵalaý, sondaı-aq Ortalyq saıabaq Astana turǵyndary men qonaqtarynyń súıikti mekenine aınalǵan. Bul jerler jyldyń kez kelgen ýaqytynda erekshe tartymdy.
Kóp uzamaı munda serýendeıtin adamdar kóbeıip, mýzyka jáne kofe men táttileri bar kóptegen dúńgirshekter bolady. Al ázirge elordanyń kesh keletin kóktemgi sátin usynamyz.
El óńirlerindegi sý tasqyny jaǵdaıynda keıbir astanalyqtar qala arqyly ótetin Esil ózenindegi sý deńgeıine alańdaýy múmkin. Alaıda Astanany sý basý qaýpi joq. Bul týraly elorda ákimdigi baspasóz qyzmetiniń basshysy Aqmaral Oljabaeva málimdedi.
«Sý deńgeıi kóterilmeıdi, esh qaýip joq. Qazirgi sý deńgeıi de normadan asqan joq», - dep jaýap berdi ol agenttik tilshisine.
«Qazgıdromet» RMK boljamynsha, 12 sáýirde elordada kún raıy jaýyn-shashynsyz, biraq bultty bolady. Kúndiz aýa temperatýrasy +10...+12°C bolýy boljanady. Sondaı-aq, sınoptıkter juma kúni túnde jáne tańerteń tuman bolatynyn eskertti. Jeldiń jyldamdyǵy 5-10 m/s bolady.
