Astanadaǵy eski vokzal qaıta jóndeýden keıin qashan ashylady
ASTANA. KAZINFORM — Kólik mınıstrligi «Astana-1» temirjol vokzalyn qaıta jańǵyrtý jumystaryna qatysty túsinik berdi.
Onyń ortasha táýliktik jolaýshylar tasymaly 10 myń adamnan asady.
Jóndeý jumystary bıyl 14 sáýirde bastaldy. Jobany Kólik mınıstrligi Astana ákimdigi jáne «Qazaqstan temir joly» UK» AQ birlesip júzege asyryp jatyr. Merdiger – Capital Road Construction JShS.
Qurylysshylar vokzaldyń ishindegi nysandardy túgel buzyp tastaǵan, ıaǵnı ǵımarattyń qabyrǵalary men beton qańqasy qaldy. Tehnıkalyq zertteýden keıin bólshekteý jumystary júrgizilip, mamandar jobalyq qujattamany ázirleýge kiristi.
Vokzal qalypty rejımde jumysyn jalǵastyryp jatyr. Osy oraıda qyzmet kórsetý personaly men jolaýshylarǵa arnalǵan nysandar burynǵy tarıhı ǵımaratqa ýaqytsha kóshirildi.
«Vokzaldy qaıta qurý jáne jańǵyrtý jumystary osy jyldyń sońyna deıin aıaqtalady dep josparlanǵan», - delingen Kólik mınıstrligi málimetinde.
Vedomstvo aqparatyna qaraǵanda, jobanyń túpkilikti quny jobalyq-smetalyq qujattama (JSQ) negizinde saraptama júrgizilgennen keıin anyqtalady. Jumys kólemi de ǵımaratty tehnıkalyq tekserý nátıjeleri men saraptamalyq qorytyndylar negizinde anyqtalady.
Bıýdjeti men qarjylandyrý kózderin nysannyń tapsyrýshysy retinde «Qazaqstan temir joly» UK» AQ anyqtaıdy.
Osy jumystar aıasynda ǵımarattyń shatyry, qasbeti, ishki nysandar, jolaýshylar platformalary men qurylymdar jóndeledi. Jumysshylar habarlaý júıelerin, beınebaqylaý, dabyl júıelerin jańartyp, ınjenerlik jelilerdi aýystyryp, vokzal mańyn kórkeıtedi.
Aıta keteıik, buǵan deıin Almatyda jańa «Almaty-3» temirjol vokzalyn salý jobasy boıynsha jumystar jalǵasyp jatqanyn jazǵan edik.