Astanadaǵy eriktiler qatarynda ata-ájeler de bar - Arslanbek Maǵzum
ASTANA. KAZINFORM – Elordadaǵy keıbir ekologııalyq aktsııalarǵa jastarmen qatar qalanyń qart turǵyndary da qatysady. Bul týraly «Jastar rýhy» JQ Astana qalalyq fılıalynyń tóraǵasy Arslanbek Maǵzum aıtty.
— Bizde «erikti degen 35 jasqa deıingi adam» degen uǵym qalyptasqan. Alaıda keıbir aktsııalarǵa ata-ájeler de qatysady. Máselen, bir apta buryn ótken aktsııamyzǵa 70-ke jaqyndaǵan ájemiz kelip kómektesti. Jalpy, Eýropa elderinde ol qalyptasqan úrdis. Olarda erikti qarııalardyń bólek uıymdary bar. Osyndaı qozǵalys bizdiń elde de bolady degen senimdemin, - dedi ol «Jibek Joly» arnasyndaǵy «BúginLive» baǵdarlamasynda.
Sondaı-aq spıker Almatyda ashylmaı jatyp vandaldardyń shabýylyna ushyraǵan Almaty Museum of Arts-taǵy jaǵdaıǵa qatysty pikirin bildirdi.
– Naqty osy jaǵdaıdy áleýmettik jeliden kórdim... Qazirgi ýaqytta vandalızm jasaǵandarǵa 200 AEK kóleminde aıyppul salynady. Bul shamamen 750 myń teńgeden astam soma (786400 tg – red.). Budan bólek, 160 saǵat qoǵamdyq jumysqa tartý jáne 50 kún qamaýǵa alý jazasy bar. Bul – kompleskti túrdegi problema. Bizdiń jastarda tárbıe bar, biraq keıbir kezderde túsiniksiz jaǵdaılar bolyp turady. Sondyqtan meniń oıymsha jastar arasynda profılaktıkalyq jumystardy kóbirek júrgizý kerek, - dedi Arslanbek Maǵzum.
Aıta keteıik, ótken jyly elimizde vandalızmge qatysty jańa zań qabyldandy.
Sondaı-aq jyl basynan beri elordada vandalızmge barǵan 160 adam jazalandy.