Astanadaǵy ekologııalyq sammıtte Aral halqynyń densaýlyǵy máselesi kóterilmek
ASTANA. KAZINFORM — Ortalyq Azııa elderi Aral teńiziniń tartylýy saldaryn azaıtý joldaryn talqylaıdy, dep habarlaıdy Densaýlyq saqtaý mınıstrliginiń baspasóz qyzmeti.
Astanada ótetin Óńirlik ekologııalyq sammıt (RES 2026) aıasynda QR Densaýlyq saqtaý mınıstrligi men Dúnıejúzilik densaýlyq saqtaý uıymynyń (DDU) uıymdastyrýymen Aral óńiri halqynyń densaýlyǵyna arnalǵan paneldik sessııany ótkizý josparlanyp otyr.
Іs-shara Ortalyq Azııa elderiniń densaýlyq saqtaý mınıstrlerin jáne DDU ókilderin biriktiredi.
— Sessııa óńirdegi eń ózekti ekologııalyq máselelerdiń biri — kóleminiń 90 paıyzdan astamyn joǵaltqan jáne halyq densaýlyǵyna, sonyń ishinde anemııa deńgeıiniń joǵary bolýyna ári túrli ekologııalyq faktorlardyń áserine yqpalyn jalǵastyryp otyrǵan Aral teńiziniń tartylýy saldaryna arnalady. Qatysýshylar bolashaq urpaqtyń densaýlyǵyn qorǵaý tásilderin talqylap, «Aral teńizi óńirindegi salaýatty bolashaq» atty Jol kartasy jobasyn tanystyrady, sondaı-aq ekologııalyq táýekelderdi azaıtý jáne ornyqty damýdy ilgeriletý maqsatynda óńirlik yntymaqtastyqty nyǵaıtý sharalaryn qarastyrady, — delingen habarlamada.
Ortalyq Azııa elderiniń úkimetteri men DDU-nyń Eýropalyq óńirlik bıýrosy arasyndaǵy úılestirilgen is-qımyldardy qalyptastyrýǵa, sondaı-aq bastamalardy DDU-nyń negizdemelik qujattarymen, halyqaralyq tabıǵatty qorǵaý kelisimderimen jáne Turaqty damý maqsattarymen sáıkestendirýge erekshe nazar aýdarylady.
Talqylaýlardyń mańyzdy bóligi birlesken bastamalardy iske asyrý úshin ornyqty saıası qoldaýdy jumyldyrý jáne halyqaralyq áriptestikti damytý máselelerine arnalmaq.
Aıta keteıik, óńirlik ekologııalyq sammıt (RES 2026) — Ortalyq Azııa elderi men basqa memleketterdi klımattyń ózgerýi, sý resýrstarynyń tozýy, tabıǵı resýrstardy turaqty basqarý jáne basqa da ózekti ekologııalyq máselelerdi sheshý úshin biriktirýge baǵyttalǵan halyqaralyq is-shara.
Budan buryn Nurjan Nurjigitov sý dıplomatııasy Aral teńizin toltyrýǵa kómekteskenin aıtty.