Astanadaǵy ekologııalyq sammıtte 30-dan astam qujatqa qol qoıylmaq
ASTANA. KAZINFORM – Qazaqstanda ótetin Óńirlik ekologııalyq sammıtke iri halyqaralyq uıymdar qatysady. Bul týraly QR Ekologııa jáne tabıǵı resýrstar vıtse-mınıstri Mansur Oshýrbaev málim etti.
- 2026 jylǵy 22-24 sáýir aralyǵynda Qazaqstanda mańyzdy halyqaralyq oqıǵa – Óńirlik ekologııalyq sammıt (ÓES) ótedi. Bul is-shara - óńirlik yntymaqtastyqty nyǵaıtýǵa jáne turaqty ekologııalyq kún tártibin ilgeriletýge baǵyttalǵan Qazaqstannyń dáıekti saıasatynyń qısyndy jalǵasy. Sammıt Birikken Ulttar Uıymymen seriktestikte ótkiziledi, sondyqtan BUU júıesiniń beıindi agenttikteri Sammıtti daıyndaýǵa jáne ótkizýge belsendi qatysady. ıÝNISEF, Jańartylatyn energııa kózderi jónindegi halyqaralyq agenttik jáne Halyqaralyq energetıkalyq agenttik sııaqty iri uıymdarmen negizgi saraptamalyq ári mazmundy qoldaý kórsetedi. Olardyń qatysýy turaqty damýdyń jahandyq basymdyqtaryn eskere otyryp, sammıttiń kún tártibin qalyptastyrýǵa jáne ozyq halyqaralyq tájirıbege súıenýge múmkindik beredi, - dedi Mansur Oshýrbaev Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, sammıtke qatysý úshin qazirgi kezde 2,5 myńnan astam adam tirkelgen jáne sonyń 1 myńnan astamy sheteldik meıman. Sondaı-aq memleket basshylaryn, halyqaralyq uıymdardyń basshylaryn, mınıstrler men delegatsııa jetekshilerin eskere otyryp, 93 joǵary laýazymdy qonaqtyń qatysýy josparlanǵan.
- Sammıttiń mazmundy bóligine keletin bolsaq, Sammıt eń aldymen naqty nátıjelerge qol jetkizýge baǵyttalǵanyn atap ótken jón. Sammıt qorytyndysy boıynsha Ortalyq Azııa memleketteri basshylarynyń ekologııa jáne ornyqty damý salasyndaǵy óńirlik yntymaqtastyq týraly birlesken deklaratsııasy qabyldanady dep kútilýde, - dedi vıtse-mınıstr.
Sammıt alańdarynda RES EXPO 2026 Halyqaralyq «jasyl» tehnologııalar kórmesin ótkizý josparlanǵan. Onda Ortalyq Azııa elderiniń iri ónerkásiptik kásiporyndary óńirdegi ekologııalyq jaǵdaıdy jaqsartý úshin engiziletin tehnologııalardy usynady.
Mansur Oshýrbaevtyń sózine qaraǵanda, sammıt barysynda 30-dan astam memorandým men kelisimge, sondaı-aq basqa da qujattarǵa qol qoıylmaq.
Taratylan málimetke qaraǵanda, ÓES aıasynda memleket basshylary deńgeıinde eki is-shara ótkizý josparlanǵan: plenarlyq otyrys jáne Halyqaralyq Araldy qutqarý qorynyń quryltaıshy memleketteri basshylary keńesiniń otyrysy.
Plenarlyq otyrysqa BUU Bas hatshysynyń ekonomıkalyq jáne áleýmettik máseleler jónindegi orynbasary Lı Tszıýnhýa, BUU Bas hatshysynyń orynbasary, BUU Qorshaǵan orta baǵdarlamasynyń (ıÝNEP) atqarýshy dırektory Inger Andersen, Dúnıejúzilik densaýlyq saqtaý uıymynyń bas dırektory Tedros Adhanom Gebreıesýs, Sýly-batpaqty alqaptar týraly Ramsar konventsııasynyń Bas hatshysy Mýsonda Mýmba qatysady dep kútilýde.
ÓES jumysyna Ortalyq Azııa elderiniń, Armenııanyń, Ázerbaıjannyń, Belarýstiń, Grýzııanyń, Irannyń, Qytaıdyń, Mońǵolııanyń, Pákistannyń, Slovakııanyń ekologııa salasyndaǵy vedomstvo basshylarynyń, BUU uıymdarynyń atqarýshy dırektorlary men ókilderiniń, halyqaralyq uıymdardyń bas hatshylary men jetekshileriniń, halyqaralyq qarjy uıymdary ókilderiniń qatysýy josparlanǵan.
Eske salsaq, byltyr Memleket basshysy Qasym-Jomart Toqaev Qazaqstan BUU-men birge Óńirlik ekologııalyq sammıtin ótkizetinin málim etti.
