Astanadaǵy dúkenderde veıpterdiń zańsyz satylýyn anyqtaý boıynsha reıd júrgizildi
ASTANA. KAZINFORM — «Zań jáne tártip» qaǵıdaty aıasynda elordanyń Baıqońyr aýdanynda nıkotınsiz temeki ónimderiniń, elektrondy tutyný júıeleriniń (veıpter), hosh ıistendirgishter men olarǵa arnalǵan suıyqtyqtardyń zańsyz satylýyn anyqtaýǵa baǵyttalǵan kezekti profılaktıkalyq reıd ótti, dep habarlaıdy Astana qalasy ákimdiginiń resmı saıty.
Reıdti Baıqońyr aýdany ákimdiginiń qyzmetkerleri, aýdandyq polıtsııa basqarmasy jáne «Astana Jastary» jastar resýrstyq ortalyǵynyń volonterleri birlesip júrgizdi.
Reıdtiń maqsaty – quqyqbuzýshylyqtardyń aldyn alý jáne bıznes ókilderi men azamattardyń qoldanystaǵy zańnama talaptaryna jaýapkershilikpen qaraýyn qalyptastyrý.
– Mundaı reıdter quqyqbuzýshylyqtardyń aldyn alýǵa jáne aýdan turǵyndarynyń, eń aldymen balalar men jasóspirimderdiń densaýlyǵyn qorǵaýǵa baǵyttalǵan. Bizdiń mindetimiz – zań talaptarynyń múltiksiz oryndalýyn qamtamasyz etý jáne qoǵamda nıkotın quramdy ónimderdiń zańsyz aınalymyna nóldik tózimdilikti qalyptastyrý, - dedi Baıqońyr aýdany ákimdiginiń bas mamany Nurıslam Batyrbek.
Reıd barysynda aýdan aýmaǵyndaǵy 20-dan astam saýda nysany tekserildi.
Veıpter men nıkotındi elektrondy tutyný júıelerin satý faktileri anyqtalǵan joq.
Barlyq saýda ornynda kásipkerler men qyzmetkerlerge atalǵan ónimderdiń aınalymyna salynǵan tyıym jáne Qazaqstan Respýblıkasynyń zańnamasynda kózdelgen jaýapkershilik sharalary týraly túsindirý jumysy júrgizildi.
Qazaqstan Respýblıkasynyń «Halyq densaýlyǵy jáne densaýlyq saqtaý júıesi týraly» kodeksine sáıkes, el aýmaǵynda veıpterdi, nıkotındi elektrondy tutyný júıelerin, sondaı-aq olarǵa arnalǵan suıyqtyqtardy ákelýge, óndirýge, satýǵa jáne taratýǵa tyıym salynǵan.
Belgilengen talaptardy buzǵany úshin Qazaqstan Respýblıkasynyń Qylmystyq kodeksiniń 301-1-babyna sáıkes qylmystyq jaýapkershilik, sondaı-aq zańnamada kózdelgen ózge de sharalar qarastyrylǵan.
Nıkotınsiz temeki ónimderin (nasvaı), elektrondy tutyný júıelerin (veıpter), hosh ıistendirgishter men suıyqtyqtardy satýdy boldyrmaý baǵytyndaǵy reıdter turaqty túrde ótkizilip keledi.
2025 jyldyń basynan beri Baıqońyr aýdany polıtsııa basqarmasy 59 reıdtik is-shara ótkizdi. Nátıjesinde nıkotınsiz temeki ónimderin (nasybaı) satý boıynsha 63 fakt anyqtalyp, ÁQBtK-niń 196-baby boıynsha 63 hattama toltyryldy.
Salynǵan aıyppuldardyń jalpy somasy 3 096 450 teńgeni qurady.
Atalǵan baǵyttaǵy profılaktıkalyq sharalar aldaǵy ýaqytta da jalǵasyn tabady.
Buǵan deıin elordadaǵy qoǵamdyq tamaqtaný oryndarynyń ıelerine órt qaýipsizdigi erejesi túsindirilgenin jazǵanbyz.