Astanadaǵy dámhanada jappaı ýlaný: Tekseris nátıjeleri belgili boldy

ASTANA. KAZINFORM — Astanadaǵy «Koktem» dámhanasynyń basqarýshy dırektory Danııar Baıtoqov jappaı ýlanýǵa sebep bolǵan – sanıtarlyq talaptarǵa saı kelmeıtin shıki et partııasy ekenin habarlady.

Eske sala keteıik, 17 sáýirde Astanadaǵy tanymal dámhanalardyń birinde 10 shaqty adam ýlanǵan bolatyn.

— Biz zerthanalyq taldaý nátıjelerin aldyq. Dámhanamyzǵa sanıtarlyq normalarǵa saı kelmeıtin ónim jetkizilgeni anyqtaldy. Sonymen qatar, ashanamyzdyń tolyqtaı taza ekeni týraly qorytyndy da qolymyzǵa tıdi. Naqty ýlaný kózi – syrttan jetkizilgen shıki et. Qazir Astana qalasy polıtsııa departamenti men SES birlesip resmı tergeý júrgizip jatyr. Biz tıisti organdarmen ashyq jumys istep, barlyq qajetti aqparatty berdik, — dep málimdedi Danııar Baıtoqov Instagram paraqshasynda.

Ol qabyldanǵan sharalar týraly da aıtty:

• Barlyq ónim joıyldy;

• Barlyq jabdyq pen úı-jaılar tolyqtaı jýylyp, tazalanyp, dezınfektsııalandy;

• Shıkizatty qabyldaýdan bastap, taǵam daıyndaýǵa deıingi barlyq kezeń qaıta tekserildi;

• Sanıtarlyq talaptar kúsheıtilip, qyzmetkerler qaıta oqytyldy;

• Shtatqa sanıtar dáriger engizildi;

• Barlyq aımaqtar kásibı túrde hımııalyq óńdeýden ótkizildi.

— Biz dámhanany barlyq protsesterdiń 100% qaýipsiz ekenine kóz jetkizgennen keıin ǵana qaıta ashamyz. Biz senimdi aqtamadyq jáne bul úshin jaýaptymyz. Bolǵan oqıǵany ózgerte almaımyz, biraq budan bylaı mundaı jaǵdaıdyń qaıtalanbaýy úshin bar kúshimizdi salamyz, — dedi Baıtoqov.

Buǵan deıin bul oqıǵaǵa baılanysty sotqa deıingi tergeý bastalǵany habarlanǵan.