Astanadaǵy «Bolashaq oıyndaryna» 800 erikti qatysady
ASTANA. KAZINFORM — Astanada 29 shilde men 9 tamyz aralyǵynda ótetin «Bolashaq oıyndary» halyqaralyq týrnırinde 800 erikti qyzmet etedi. Olardyń jasy 16-dan 70 jasqa deıingi aralyqty qamtıdy, dep habarlaıdy Astana ákimdiginiń resmı saıty.
Volonterlik baǵdarlamaǵa qyzyǵýshylyq buryn-sońdy bolmaǵan deńgeıge jetti.
Uıymdastyrýshylarǵa 1400-den astam ótinim kelip tústi. Birneshe kezeńnen turatyn irikteý nátıjesinde 900-1000 úmitkerden turatyn pýl jasaqtalyp, olardyń 800-i negizgi quramǵa, al qalǵandary rezerv quramǵa engizildi.
Baǵdarlamaǵa ártúrli býyn ókilderi qatysyp jatyr. Eń jas volonter — 16 jasta, al eń úlkeni — 70 jasta. Bul halyqaralyq deńgeıdegi iri sporttyq oqıǵanyń bir bóligi bolýǵa degen umtylystyń jasqa qaramaıtynyn taǵy bir márte dáleldegendeı.
Іrikteý birneshe talap boıynsha júrgizildi. Jas ereksheliginen bólek, úmitkerlerden B1-B2 jáne odan joǵary deńgeıde shet tilin meńgerý, komandada jumys isteı bilý, kúızeliske tózimdilik jáne ózgermeli jaǵdaılarǵa jyldam beıimdelý qabileti talap etildi.
Jarys bastalǵanǵa deıin árbir volonter arnaıy oqytý kýrsynan ótedi. Baǵdarlama barysynda olar halyqaralyq servıs standarttaryn, sportshylarmen, resmı delegatsııalarmen, buqaralyq aqparat quraldarynyń ókilderimen jáne jankúıerlermen jumys isteý erekshelikterin meńgeredi.
Týrnır kezinde eriktiler 16 fýnktsıonaldyq baǵyt boıynsha qyzmet atqarady. Olar qatysýshylardy áýejaıdan qarsy alyp, akkredıtteýden ótýine kómektesedi, resmı delegatsııalardy súıemeldeıdi, kólik logıstıkasyn úılestirýge qatysady, medıtsınalyq qyzmetterdiń, baspasóz ortalyǵynyń jumysyna qoldaý kórsetedi, ashylý jáne jabylý saltanattaryn uıymdastyrýǵa atsalysady. Sonymen qatar sport arenalary men kórermender aımaqtarynda da qyzmet etedi.
«Bolashaq oıyndary — 2026» aıaqtalǵannan keıin baǵdarlamaǵa qatysqan árbir volonterge halyqaralyq úlgidegi volonterlik sertıfıkat jáne týrnırdiń arnaıy brendtik estelik syılyqtary tabystalady.
Volonterlerdiń jumysy alǵashqy jarys bastalmaı turyp-aq qolǵa alynady jáne týrnır tolyq aıaqtalǵanǵa deıin jalǵasady. Olar eń birinshi bolyp qonaqtardy qarsy alady, sportshylarǵa qoldaý kórsetedi, myńdaǵan kórermenge baǵyt-baǵdar beredi jáne barlyq qyzmetterdiń úılesimdi jumys isteýine yqpal etedi. Olardyń eńbegi «Bolashaq oıyndary — 2026» týrnıriniń joǵary deńgeıde uıymdastyrylýyna, qonaqjaılyq pen ashyqtyq atmosferasyn qalyptastyrýǵa, sondaı-aq halyqaralyq sporttyq is-sharanyń tabysty ótýine eleýli úles qosady.
Buǵan deıin «Bolashaq oıyndary — 2026» týrnırinde Astanada kórermenderdi ne kútetinin jazǵanbyz.
