Astanadaǵy «Bolashaq oıyndary» fıdjıtal-qozǵalysqa tyń serpin beredi – Prezıdent
ASTANA. KAZINFORM – Memleket basshysy Qasym-Jomart Toqaev «Bolashaq oıyndary – 2026» halyqaralyq týrnıriniń resmı ashylýynda sóz sóıledi.
– Búgin biz «Bolashaq oıyndary – 2026» halyqaralyq saıysyn bastaımyz. Bul – elderimiz arasyndaǵy dostyq qarym-qatynasty nyǵaıtatyn, maǵynasy aıryqsha tarıhı is-shara. Dúbirli doda bıyl Qazaqstanda alǵash ret ótip jatyr. Biz úshin bul zor mártebe. Jańa ǵana Reseı prezıdenti Qazaqstanǵa jáne barsha sportshylarǵa arnaıy quttyqtaýyn joldady. Ystyq yqylasy úshin Reseı kóshbasshysy Vladımır Vladımıruly Pýtınge zor rızashylyǵymdy bildiremin, – dedi Prezıdent.
Saltanatty keshke Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov jáne Tájikstan Prezıdenti Emomalı Rahmon qatysyp jatyr. Prezıdent baýyrlas elderdiń basshylaryna jáne resmı delegatsııa jetekshilerine alǵys aıtty.
– Barshańyzǵa málim, Bolashaq oıyndary – Reseıdiń bastamasymen júzege asqan joba. Bul jobanyń sátti iske asýy Prezıdent Vladımır Pýtınniń arqasy deýge tolyq negiz bar. Az ýaqyt ishinde bul jarys jahandyq deńgeıdegi saıysqa aınaldy. Birinshi joba Qazan qalasynda ótip, sodan keıin Ábý Dabıde jalǵasyn tapty. Al búgin bárimiz uly dala tósinde bas qosyp otyrmyz, – dedi Qasym-Jomart Toqaev.
«Bolashaq oıyndaryna» qatysý úshin Astanaǵa otyzdan astam memleketten 800-ge jýyq sportshy keldi.
– Astanadaǵy Bolashaq oıyndary klassıkalyq sport pen kıberındýstrııany toǵystyrǵan jahandyq fıdjıtal-qozǵalysqa tyń serpin beredi dep senemin, – dedi Memleket basshysy.
Eske sala keteıik, «Bolashaq oıyndary – 2026» týrnıri Astanada 29 shilde men 9 tamyz aralyǵynda ótedi. Jarysqa 34 elden 800-den astam sportshy qatysady.
Týrnırdiń jalpy júlde qory 4 mln 650 myń AQSh dollary.
Aıta keteıik, Prezıdent Teleradıokesheni «Bolashaq oıyndary – 2026» týrnıriniń televızııalyq túsirilimin jasaıdy.
