Astanadaǵy bilim berý uıymdaryndaǵy 12 myńnan astam kamera jedel basqarý ortalyǵyna qosyldy
ASTANA. KAZINFORM — Astana polıtsııa departamenti bilim basqarmasymen birlesip, bilim berý uıymdaryndaǵy beınebaqylaý kameralaryn polıtsııanyń Jedel basqarý ortalyǵyna qosý jobasyn júzege asyryp jatyr.
Polıtsııanyń málimetinshe, qazirgi ýaqytta qaladaǵy 224 bilim berý uıymynyń beınebaqylaý kameralary men dabyl túımeleri ortalyqqa qosylǵan. Olardyń qatarynda balabaqshalar, mektepter, kolledjder jáne joǵary oqý oryndary bar. Jalpy júıege 12 myńnan astam beınekamera shyǵarylǵan.
— Bul júıe bilim berý uıymdaryndaǵy jaǵdaıdy turaqty baqylaýǵa, yqtımal quqyq buzýshylyqtardy der kezinde anyqtaýǵa jáne oqıǵa bolǵan jaǵdaıda polıtsııa qyzmetkerleriniń jedel áreket etýine múmkindik beredi. Al bilim berý uıymdarynda ornatylǵan dabyl túımeleri tótenshe jaǵdaı týyndaǵanda polıtsııaǵa shuǵyl habar berýge arnalǵan, — delingen habarlamada.
Jyl basynan beri beınebaqylaý kameralary arqyly bilim berý uıymdarynda 100-den astam quqyq buzýshylyq anyqtalǵan. Olardyń arasynda tóbeles, temeki shegý jáne spırttik ishimdik ishý faktileri bar.
Polıtsııanyń habarlaýynsha, beınebaqylaý júıesin Jedel basqarý ortalyǵyna shyǵarý — balalardyń qaýipsizdigin qamtamasyz etýdiń tıimdi tetikteriniń biri. Ol quqyq buzýshylyqtardyń aldyn alyp qana qoımaı, bolǵan oqıǵalarǵa jedel den qoıýǵa jáne bilim berý uıymdaryndaǵy qaýipsizdik deńgeıin arttyrýǵa múmkindik beredi.
Eske salaıyq, buǵan deıin Qazaqstanda beınebaqylaý júıelerine qoıylatyn alǵashqy ulttyq standart bekitilgenin habarlaǵan edik. Jańa qujatta beınekameralardy tańdaý, ornatý jáne paıdalaný talaptary naqty aıqyndalǵan. Standart 2026 jylǵy 1 qyrkúıekten bastap kúshine enip, jańa salynatyn jáne qaıta jańǵyrtylatyn ǵımarattardaǵy beınebaqylaý júıelerine qoldanylady.
