Astanadaǵy bıik ǵımarattardyń birinde tikushaqtyń qatysýymen órtke qarsy jattyǵý ótedi

ASTANA. KAZINFORM – Tótenshe jaǵdaılar mınıstrligi turǵyndardy tótenshe jaǵdaı kezinde saýatty qımyldaýǵa úıretýdi josparlap otyr. Vedomstvo basshysy Shyńǵys Árinov Úkimet otyrysynda osyndaı josparyn aıtty.

«Biz halyqty oqytý men jattyǵýlar arqyly tótenshe jaǵdaılar kezinde durys áreket etýge úıretemiz. Mysaly, turǵyndardy is júzinde evakýatsııalaı otyryp, kópqabatty úılerde shartty túrde órt bolǵan jattyǵýlar ótkizemiz. Respýblıka boıynsha barlyǵy 250-den astam osyndaı oqý-jattyǵýlar ótkizildi», - dedi ol.

Mınıstr mundaı sharalar halyqtyń qaýipsizdik mádenıetin kóteredi dep otyr.

«Astana qalasynyń záýlim úılerindegi turǵyndardy evakýatsııalaýǵa tikushaq qoldana otyryp, jattyǵý ótkizýdi alǵash ret josparlap otyrmyz. Júrgizilip jatqan jumystar azamattardy órt kezinde ózin-ózi qutqarý daǵdylaryna kezeń-kezeńimen úıretedi, osylaısha qaýipsizdik mádenıetiniń deńgeıin arttyramyz», - dedi Shyńǵys Árinov.

Eske sala keteıik, buǵan deıin TJM záýlim ǵımarattarda órt sóndiretin drondar satyp alýdy josparlap otyrǵanyn habarlaǵan edik.