Astanadaǵy balalar aýrýhanasy tósek sanyn 453-ke deıin ulǵaıtty

ASTANA. KAZINFORM – Astanadaǵy №3 kópbeıindi balalar aýrýhanasynyń dırektory Marat Ábdýov maýsymdyq jedel respıratorlyq vırýstyq ınfektsııalar men tumaýdyń kóbeıýi kezeńinde balalarǵa arnalǵan statsıonardaǵy tósek qorynyń júktemesi artqanyn málimdedi.

Onyń aıtýynsha, statsıonar 288 tósekke eseptelgen. Alaıda patsıentterdiń kóbeıýine baılanysty tósek sany 453-ke deıin keńeıtilgen. Onyń ishinde 243 tósek – vırýstyq ınfektsııa juqtyrǵan balalarǵa arnalǵan.

Dırektordyń dereginshe, táýligine statsıonardyń qabyldaý bólimine 450-500-ge deıin bala júginedi. Solardyń tek 20-25 paıyzy ǵana aýrýhanaǵa jatqyzýdy qajet etedi. Qalǵandaryna úı jaǵdaıynda em qabyldaýy úshin dárigerdiń tıisti usynymdary beriledi.

«Bizdiń ınfektsııalyq statsıonar tósekter sanyn 550-ge deıin ulǵaıtýǵa daıyn. Syrqattanýshylyq ósken jaǵdaıda qoldanylatyn rezervterimiz bar, dári-dármekpen tolyq qamtamasyz etilgenbiz», – dedi Marat Ábdýov.

Sonymen qatar ol ata-analardy statsıonardyń qabyldaý bóliminde jınalmaýǵa shaqyrdy. Onyń aıtýynsha, bul ózge ınfektsııalarmen aıqaspaly juqtyrý qaýpin kúsheıtedi.

Dárigerler aýrý belgileri paıda bolǵan jaǵdaıda turǵyndarǵa óz ýchaskelik dárigerine, fıltr-kabınetterge, emhanalardyń shuǵyl kómek bólimshelerine júginýdi nemese mobıldi brıgadany shaqyrýdy usynady.

Aıta keteıik, Densaýlyq saqtaý mınıstrligi tumaý men JRVI kórsetkishi ótken jylmen salystyrǵanda 19%-ǵa tómendegenin málimdedi.