Astanadaǵy avtobýs apaty: júrgizýshige qatysty qylmystyq is toqtatyldy

ASTANA. KAZINFORM – Elordada qoǵamdyq kólik júrgizýshisi rólge ıe bola almaı baǵanǵa soǵyp, apat saldarynan jasóspirim qyz qos aıaǵynan aıyrylǵan edi.

Búgin belgili bolǵandaı, avtobýs júrgizýshisine raqymshylyq jasaldy. Bul týraly Astana qalasynyń polıtsııa departamenti habarlaıdy. 

- Jol qozǵalysy erejesin buzyp, densaýlyqqa zııan keltirýge ákep soqqan oqıǵa boıynsha qylmystyq is materıaly men saraptama qorytyndysy avtobýs júrgizýshisiniń kinásin rastady. Qazaqstan Respýblıkasynyń «Raqymshylyq týraly» zańyna sáıkes, kúdikti tarapynan qylmystyq qýdalaýdy toqtatý týraly ótinish kelip tústi, - delingen habarlamada. 

Aqparatta aıtylǵandaı, qylmystyq is raqymshylyq aktisine baılanysty toqtatyldy. 

- Qylmystyq is toqtatylǵanyna qaramastan, aıypty qylmystyq jaýapkershilikke tartylǵan dep esepteledi. Budan bólek, qylmystyq quqyq buzýshylyq pen ózge de zań buzýshylyqtarǵa yqpal etken mán-jaıdy joıý týraly usynys Astana qalasynyń ákimdigine joldandy,- degen habar aldyq elorda polıtsııasynan. 

Eske sala keteıik, bıyl 2 maýsymda Astanada avtobýs júrgizýshisi rólge ıe bola almaı, jol jıegindegi baǵanǵa soqtyǵysqany anyqtaldy. 

Jol apatynan bir zardap shegýshiniń jaǵdaıy aýyr ekeni, ota jasalatyny aıtyldy. Keıin zardap shekken 1 jolaýshynyń aıaǵyna ampýtatsııa jasalǵany belgili boldy.

Sondaı-aq saqtandyrý kompanııasy qos aıaǵynan aıyrylǵan qyzdyń otbasyna 20 mln teńgege jýyq tólem jasaǵany aıtyldy.