Astanadaǵy avtobýs apaty: zardap shekkenderge ótemaqy tólenedi
ASTANA. KAZINFORM — Qala ákimdigi zardap shekkenderge medıtsınalyq jáne psıhologııalyq kómek kórsetip jatyr, sondaı-aq materıaldyq jáne basqa da qajetti qosymsha kómek kórsetiletin bolady, dep habarlaıdy vedomstvonyń baspasóz qyzmeti.
— Qoǵamdyq kóliktiń soqtyǵysýy saldarynan úsh jolaýshy medıtsınalyq mekemelerge jetkizildi. Olardyń jaǵdaıy aýyr jáne asa aýyr dep baǵalanyp otyr. Olardyń biriniń aıaǵynyń tómengi jaǵy ampýtatsııalandy. Qala ákimdigi zardap shekkenderge medıtsınalyq jáne psıhologııalyq kómek kórsetip jatyr, sondaı-aq materıaldyq jáne basqa da qajetti qosymsha kómek kórsetiletin bolady. Zardap shekken jolaýshylarǵa qoldanystaǵy zańnamaǵa sáıkes, medıtsınalyq jáne saqtandyrý saraptamalary júrgizilgennen keıin aqshalaı ótemaqy tólenedi, — delingen Astana ákimdigi taratqan aqparatta.
Sonymen qatar vedomstvo avtobýs júrgizýshisiniń jolaýshylar kóligin júrgizý salasynda jalpy eńbek ótili 15 jyldan asady, al avtoparkte 2020 jyldan beri jumys isteıtinin atap ótti.
— Oqıǵa bolǵan kúni ol aldyn ala mindetti medıtsınalyq tekseristen ótip, jumysqa jiberilgen. Jumysqa demalystan keıingi alǵashqy kúni shyqqan. Avtobýs 2024 jylǵy, jelige shyqqan sátte tehnıkalyq turǵydan jaramdy kúıde bolǵan, — delingen habarlamada.
Budan bólek, avtobýstar jelige shyqpas aldyn avtobýs parkiniń jaýapty qyzmetkerleri kún saıyn mynadaı jumys júrgizedi:
• kóliktiń kózge kórinetin tustaǵy zaqymdaryn tekserý;
• júrgizýshige qajet jıyntyqtyń (órt sóndirgish, alǵashqy medıtsınalyq kómek qobdıshasy, súıretkish arqan, domkrat, apattyq toqtaý belgisi) bolýyn tekserý;
• negizgi toraptar, júıeler men mehanızmderdiń jumys isteýin tekserý;
• júrgizýshilerdiń medıtsınalyq tekserisi (qan qysymyn ólsheý, dene qyzýyn ólsheý jáne t. b.).
Ákimdiktiń málimetinshe, atalǵan fakt boıynsha qalalyq polıtsııa departamenti qylmystyq is qozǵady. Jan-jaqty tekserý júrgizilýde, barlyq mán-jaı anyqtalyp jatyr.
Buǵan deıin Astanada avtobýs júrgizýshisi rólge ıe bola almaı, jol jıegindegi baǵanǵa soqtyǵysqany anyqtaldy. Jol apatynan bir zardap shegýshiniń jaǵdaıy aýyr ekeni, ota jasalatyny aıtyldy. Búgin zardap shekken 1 jolaýshynyń aıaǵyna ampýtatsııa jasalǵany belgili boldy.