Astanadaǵy avtobýs apaty: zardap shekken balanyń otbasyna 30 mln teńgedeı beriledi

ASTANA. KAZINFORM — https://kaz.inform.kz/news/astanadagi-avtobus-apati-br-zardap-shegushnn-zhagdayi-auir-ota-zhasaladi-329f01/Astana qalasynda bolǵan jol-kólik oqıǵasyna baılanysty zardap shekken balanyń otbasyna alǵashqy kúnnen bastap jan-jaqty kómek kórsetilip jatyr, dep jazdy elorda ákimdigi.

Ákimdik pen avtobýs parkiniń ókilderi balanyń ata-anasymen jáne týystarymen kezdesken.

- Qoldaý kórsetý boıynsha mynadaı sharalar belgilendi:

• avtobýs parki saqtandyrý polısi esebinen 19,6 mıllıon teńge kóleminde saqtandyrý tólemi (qazirgi ýaqytta zań aıasynda tıisti rásimder júrgizilýde);
• qosymsha avtobýs parki tarapynan 10 mıllıon teńge kóleminde demeýshilik kómek kórsetý týraly sheshim qabyldandy;
• otbasy Aqmola oblysynan bolǵandyqtan, emdelý jáne ońalý kezeńinde ýaqytsha baspana jaldaý boıynsha kómek usynyldy;
• medıtsınalyq jáne psıhologııalyq kómek kórsetilip jatyr;
• áleýmettik qoldaý máseleleri boıynsha súıemeldeý qamtamasyz etilip jatyr, - delingen aqparatta.

Derekke qaraǵanda, balanyń jaǵdaıy turaqty, beıindi bólimshege aýystyryldy.
Zardap shekken qyz balanyń týystaryna qabyldanǵan jáne usynylǵan sharalar týraly tolyq aqparat berildi.

Qala ákimdigi alǵashqy kúnnen bastap zardap shekkenderge qajetti kómek kórsetip keledi. Bul sharalar otbasyǵa janashyrlyq pen shynaıy qoldaý kórsetý maqsatynda qolǵa alyndy. Bizdiń ókilderimiz otbasymen turaqty baılanysta bolyp, zardap shekken qyz balanyń saýyǵyp, jan-jaqty qoldaý alýyn qamtamasyz etý úshin bar kúshin salyp jatyr.

Sonymen qatar, aýrýhanada jatqan eki naýqasqa da jan-jaqty kómek kórsetilip jatyr. Olar da saqtandyrý tólemin alady.

Eske salaıyq, keshe keshke Astanada qoǵamdyq kólik júrgizýshisi rólge ıe bola almaı, jol jıegindegi baǵanǵa soqtyǵysty. Saldarynan birneshe adam zardap shekti.

Artynsha bir zardap shegýshi jolaýshynyń jaǵdaıy aýyr ekeni jáne ota jasalǵany habarlandy.

Búgin zardap shekken 1 jolaýshynyń aıaǵyna ampýtatsııa jasaldy.

Sondaı-aq elorda ákimdigi jol apatynan zardap shekken jandarǵa ótemaqy tóleıtini belgili boldy.

Astanadaǵy avtobýs apatyna kináli júrgizýshi qamaýǵa alyndy.