Astanadaǵy avtobýs apaty: aıaǵynan aıyrylǵan qyzdyń otbasyna 20 mln teńgege jýyq tólem jasaldy

ASTANA. KAZINFORM — «Eýrazııa» saqtandyrý kompanııasy Astanada avtobýs apaty saldarynan eki aıaǵynan aıyrylǵan qyz balanyń otbasyna 19,66 mıllıon teńge kóleminde jedel saqtandyrý tólem jasady. 

Kompanııa ókilderiniń túsindirýinshe, tólem jolaýshylar tasymaldaýshynyń azamattyq-quqyqtyq jaýapkershiligi mindetin saqtandyrý aıasynda jasalǵan. Avtoparktyń jaýapkershiligi «Eýrazııa» saqtandyrý kompanııasynda saqtandyrylǵan.

Balaǵa uzaq merzimdi emdeý, ońaltý jáne keıinnen protez salý qajet bolatynyn eskere otyryp, kompanııa zańnamada kózdelgen qujattar paketi tolyq jınalǵanyn jáne múgedektigi týraly anyqtamany kútpeı-aq, tolyq kólemde tólem jasaý týraly sheshim qabyldady.

— Tasymaldaýshynyń jolaýshylar aldyndaǵy azamattyq-quqyqtyq jaýapkershiligin mindetti saqtandyrý týraly zańǵa sáıkes, eger jol apaty saldarynan bala múgedek bolyp qalsa, 5 000 AEK mólsherinde, ıaǵnı 19 660 000 teńge kóleminde tólem kózdelgen. Qazaqstanda múgedektik anyqtamasyn alý úshin medıtsınalyq-áleýmettik saraptamadan ótý qajet, ol kóp ýaqyt alady, — dep málimdedi «Eýrazııa» saqtandyrý kompanııasynyń ókilderi.

Sondaı-aq, kompanııa saqtandyrý jaǵdaıynan keıin zardap shekken avtobýs jolaýshylary men olardyń ókilderine arnalǵan jedel jeli uıymdastyrylǵanyn eske saldy. Barlyq júgingen azamatqa saqtandyrý tólemin alý tártibi túsindirilip, keńes berildi.

Birneshe kún buryn Astanada avtobýs júrgizýshisi rólge ıe bola almaı, jol jıegindegi baǵanǵa soqtyǵysqany anyqtaldy. 

Jol apatynan bir zardap shegýshiniń jaǵdaıy aýyr ekeni, ota jasalatyny aıtyldy.  Keıin zardap shekken 1 jolaýshynyń aıaǵyna ampýtatsııa jasalǵany belgili boldy. 

Aıta keteıik, Astanadaǵy avtobýs apatynan aıaǵynan aıyrylǵan qyz bala memlekettik járdemaqy alady.