Astanadaǵy avtobýs apaty: aıaǵynan aıyrylǵan qyz bala memlekettik járdemaqy alady
ASTANA. KAZINFORM – Astanada avtobýs apatynan eki aıaǵynan aıyrylǵan 8 jastaǵy qyz balaǵa memleketten járdemaqy beriledi. Bul týraly QR Eńbek jáne halyqty áleýmettik qorǵaý vıtse-mınıstri Vıktorııa Shegaı Úkimet otyrysynan keıingi baspasóz máslıhatynda aıtty.
«8 jastaǵy qyz bala japa shekken jol-kólik oqıǵasyna qatysty aıtar bolsaq, bul baǵytta negizinen Densaýlyq saqtaý mınıstrligi jumys istep jatyr. Qazirgi tańda oǵan shuǵyl medıtsınalyq kómek kórsetilip jatyr. Medıtsınalyq kómek pen ońaltý boıynsha qajetti protsedýralar aıaqtalǵannan keıin oǵan respýblıkalyq bıýdjetten memlekettik járdemaqy tólenetin bolady», – dedi Vıktorııa Shegaı.
Sondaı-aq ol qyz balanyń anasyna múmkindigi shekteýli balanyń kútimine baılanysty járdemaqy tólenetinin aıtty.
Vıtse-mınıstr járdemaqynyń naqty somasyn atamady, biraq balanyń eńbekke qanshalyqty jaramsyzdyǵyna baılanysty jeke esepteletinin atap ótti.
Buǵan deıin Astana ákimdigi avtobýs apatynan zardap shekken balanyń otbasyna 30 mln teńgedeı beriletinin habarlady.
Kúni keshe zardap shekken balanyń anasy - Alýanyń otbasyna ákimdik 4 bólmeli páter syılady.