Astanadaǵy aýla klýbynda 300 bala úıirmelerge tegin qatysa alady
Astanadaǵy aýla klýbyna 300-den astam bala, sonyń ishinde erekshe qajettiligi bar balalar tegin qatysa alady, dep habarlaıdy Kazinform.
Respýblıka kúnine oraı elordada «Túrli - teń» ınklıýzıvti aýla klýby ashyldy.
Klýb aı saıyn 300-den astam balany qabyldaı alady.
Klýbtyń ashylý saltanatyna Esil aýdany ákimi Asylbek Esenbaev, Respublica partııasynyń ortalyq apparaty basshysynyń orynbasary Igor Kopaılov, sondaı-aq, erekshe kútimdi qajet etetin balalar jáne olardyń ata-analary men ata-ájeleri qatysty.
Erekshe qajettiligi bar balalar úshin klýb doıby jáne shahmat úıirmelerin usynady.
Endi fızıoterapııa kabınetin ashý, ıoga jáne darts sabaqtaryn ótkizý, beıneleý óneri, dombyra tartý jáne robototehnıka úıirmelerin ashýdy josparlap otyr.
«Balalar — árbir memlekettiń bolashaǵy, biz búgin Respýblıka kúni qarsańynda Esil aýdanynda tórtinshi aýla klýbyn ashyp otyrmyz. Aýla klýbtary — balalardy tartý, qarym-qatynas jáne damytý ortalyqtary. Biz erekshe bilim berýdi qajet etetin balalarǵa úlken kóńil bólemiz jáne mundaı bastamalardy árdaıym qoldaımyz», — dedi Esil aýdanynyń ákimi Asylbek Esenbaev.
Aıta ketsek, jobanyń ıdeıalyq dem berýshisi, bastamashysy jáne uıymdastyrýshysy — Muhtar Baımaǵulov.
Eńbek ardageri, ınjener-qurylysshy, «Tań» tatar-bashqurt mádenı ortalyǵynyń vıtse-prezıdenti bolǵan Rafaıl Ablakov oǵan Abaıdyń qara sózderi jınaǵyn syıǵa tarta otyryp:
«Óskeleń urpaq — keleshektiń ıesi. Sizder, jastar, jalpy adamzattyq qundylyqtardy bekitip, dáriptep, Qazaqstannyń gúldenýine óz úlesińizdi qosatyn azamatsyzdar. Armandaryńyz oryndalyp, ıgi isterińiz muqtaj jandarǵa demeý bolsyn», — dedi aqsaqal.
Esil aýdanynda barlyǵy úsh aýla klýby jumys isteıdi, onyń ekeýi Prıgorodnyı jáne Zarechnoe eldi mekenderinde ornalasqan, sonymen qatar erekshe qajettiligi bar balalarǵa arnalǵan tórt ortalyq bar.
