Astanadaǵy aýyl sharýashylyǵy jármeńkesinde elimizdiń úsh óńiri óz ónimderin usynady

ASTANA. KAZINFORM - 19-20 qazan, osy demalys kúnderi Shyǵys Qazaqstan, Soltústik Qazaqstan jáne Qaraǵandy oblystary elordaǵa 1200 tonnadan astam ónim ákeledi, dep habarlaıdy Astana ákimdiginiń resmı saıty.

Bul joly ónimniń 735 tonnadan astam úlesin Soltústik Qazaqstan oblysy ákeledi. Onyń úshten biri – kartop pen kókónister. Sondaı-aq soltústiktik fermerler barlyq túrdegi et, sút ónimderi, jumyrtqa, un, shujyq jáne makaron ónimderin ákeledi.

Shyǵys Qazaqstan oblysy elorda turǵyndary men qonaqtaryn aımaqqa áıgili balmen qýantady, bul – shamamen 70 tonna. Sondaı-aq 40 tonnaǵa jýyq aýylsharýashylyq janýarlary men qus eti jáne t.b. ákeledi.

Qaraǵandy oblysynyń agrarshylary 400 tonnaǵa jýyq ónim usynady, onyń jartysy – kartop pen kókónister. Sondaı-aq barlyq túrdegi et, elordalyq dúkenderde suranysqa ıe sút ónimderi, balyq jáne basqa da ónimder bar.

Elorda turǵyndary men qonaqtary ónimderdi naryqtaǵy baǵadan tómen baǵamen satyp alyp qana qoımaı, sonymen qatar atalǵan óńirlerden kelgen ártisterdiń qatysýymen kontserttik baǵdarlamany tamashalaı alady. Jármeńke 9:00-den 18:00-ge deıin ashyq bolady.

Aıta keteıik, Aýyl sharýashylyǵy jármeńkesi Qarqaraly tas jolyndaǵy «Qazanat» ıppodromyna qarama-qarsy orynda ótedi. Elorda turǵyndary men qonaqtaryna yńǵaıly bolýy úshin jármeńkelerdi ótkizý kezeńinde № 18, 37, 303 jáne 323 avtobýs marshrýttary qamtamasyz etildi.

Jármeńkeler ár demalys kúnderi 27 qazanǵa deıin ótedi.