Astanadaǵy aýyl sharýashylyǵy jármeńkesinde aqmolalyqtar 500 tonnaǵa jýyq ónim saýdalady
ASTANA. KAZINFORM - Respýblıka kúni qarsańynda elordanyń «Qazanat» ıppodromy úlken merekesine aınaldy. Aýyl sharýashylyǵy ónimderiniń sapasymen aty shyqqan Aqmola oblysy astanalyqtar men qala qonaqtaryna baǵasy qoljetimdi, tabıǵı ónimderdiń keń tańdaýy men dámin usyndy, dep habarlaıdy oblystyq ishki saıasat basqarmasy.
Óńirdiń 17 aýdanynan jáne Kókshetaý, Stepnogor, Qosshy qalalarynan kelgen 100-den astam aýyl sharýashylyǵy taýar óndirýshileri men qaıta óńdeý kásiporyndary elordaǵa shamamen 50 túrli ónim ákeldi. Saýda sórelerinde et jáne shujyq ónimderi, sút taǵamdary, balyq, jumyrtqa, un, kókónis pen kartop sııaqty tabıǵı ári sapaly taýarlar qoıyldy. Jıyntyq kólemi 460 tonnadan asqan bul ónimder – aqmolalyq jerdiń berekesi men eńbek adamdarynyń mańdaı teriniń nátıjesi.
«Biz búgin astanalyqtarǵa Aqmola oblysynyń eń úzdik ónimderin usynýǵa erekshe qýanyshtymyz. Bizdiń óńir elimizdiń agrarlyq salasynda árdaıym kósh bastap keledi. Ákelip otyrǵan ónimimiz – tek taýar emes, bul – eńbegimizdiń jemisi, halqyma degen qamqorlyǵymyzdyń kórinisi. Árbir qazaqstandyq taza ári sapaly taǵamdy ádil baǵamen alýy úshin eńbek etemiz. Jármeńkege óńirdiń 130 kásiporny qatysyp otyr, – dedi oblystyq aýyl sharýashylyǵy basqarmasy basshysynyń orynbasary Dýlat Serdáli.
Jármeńke astanalyqtar arasynda úlken qyzyǵýshylyq týdyrdy. Kóptegen turǵyndar sapaly ónimdi tikeleı óndirýshiden alýǵa múmkindik tapty. Solardyń biri – elorda turǵyny Serıkjan Eshmuratova otbasymen birge kelip, satyp alǵanyna rıza boldy:
-Mundaı sharalardy jibermeýge tyrysamyz. Munda árdaıym balǵyn ári dámdi ónim tabylady. Búgin et pen kókónis aldym, bári sapaly, tabıǵı ónim ekeni birden baıqalady. Aqmolalyqtar jyl saıyn osylaı mol ónim ákelip, astanalyqtardy qýantady, – dedi ol.
Kelýshilerdiń qolaılylyǵy úshin jármeńkede 30-dan astam volonter jumys istep, satyp alynǵan zattardy tıeýge jáne jetkizýge kómektesti. Sondaı-aq merekelik kóńil-kúıdi Aqmola oblysynan kelgen ónerpazdardyń kontserttik baǵdarlamasy erekshe jandandyra tústi.
Aıta ketý kerek, Aqmola oblysy tek ónim usynyp qana qoımaı, eldiń azyq-túlik qaýipsizdigin qamtamasyz etýde de mańyzdy ról atqarady. Bıyl óńir sońǵy on jyldaǵy eń joǵary kórsetkishke jetip, 7,5 mıllıon tonna astyq jınady.
Qazirgi tańda aqmolalyq kásiporyndar elordany turaqty túrde azyq-túlikpen qamtamasyz etip keledi: táýligine 130 tonna sút ónimi, 80 tonna et, 700 myń dana jumyrtqa jáne 25 tonna un jóneltiledi.