Astanadaǵy «Atameken» etno-memorıaldy kesheni basqa jerge kóshirile me
ASTANA. KAZINFORM — «Atameken» etno-memorıaldy kesheni qazir jabyq tur. Astana qalasynyń Mádenıet basqarmasy bul nysanǵa qatysty aldaǵy jospary týraly málim etti.
— «Atameken» etno-memorıaldy kesheni apatty jaǵdaıda dep tanylǵandyqtan, jumysyn toqtatty. Bıyl etno-memorıaldy keshendi súrý josparda joq, — dep jaýap berdi basqarmadan agenttik tilshisine.
Sondaı-aq keshenniń qyzmetkerleri túgeldeı jumyspen qamtylǵan.
— Keshende 26 qyzmetker jumys istedi, qazir bul qyzmetkerler Astana qalasy ákimdiginiń «Birlesken murajaılar dırektsııasy» memlekettik mekemesinde jumysyn jalǵastyryp jatyr, — delingen resmı saýal jaýabynda.
Basqarmadan málim etkendeı, bolashaqta basqa jerde «Atameken» etno-memorıaldy kesheni tektes nysan salý josparda joq.
Eske sala keteıik, «Atameken» etno-memorıaldy kesheni 2001 jyly 8 qyrkúıekte ashyldy. Keshen aýmaǵynda barlyǵy 200-den astam mınıatıýra bar. Qazaqstannyń úlken kartasyna barlyq oblystar men elimizdiń bas qalalary — Astana men Almaty syıǵan.
Resmı málimetke súıensek, keshendi 2023 jyly — 17 859 adam, 2024 jyly — 27 055 adam tamashalaǵan.