Astanadaǵy «Astana Eurasian Book Fair – 2026» halyqaralyq kitap kórmesi aıaqtaldy
ASTANA. KAZINFORM – Elordada Ortalyq Azııadaǵy eń iri mádenı alańdardyń birine aınalǵan «Astana Eurasian Book Fair – 2026» IX halyqaralyq kitap kórme-jármeńkesi aıaqtaldy, dep habarlaıdy qala ákimdiginiń resmı saıty.
Іs-shara 22-26 sáýir aralyǵynda Prezıdent ortalyǵynda ótip, ártúrli elderden kelgen baspagerlerdiń, jazýshylardyń, sarapshylar men oqyrmandardyń basyn qosty. Uıymdastyrýshylar – dástúrli túrde QR Mádenıet jáne aqparat mınıstrligi, Astana qalasynyń ákimdigi jáne «Qazaq Creative» kreatıvti ındýstrııalardy damytý qorynyń qoldaýymen «Folıant» baspasy.
Bıyl kórmege 80-nen astam uıym qatysty – baspa, ǵylymı-bilim berý jáne polıgrafııalyq kompanııalar. Qatysýshylardyń jartysyna jýyǵyn qazaqstandyq baspalar qurady. Sonymen qatar Reseı, Túrkııa, Qyrǵyzstan, Ózbekstan, Ázerbaıjan, Mońǵolııa, Ispanııa, Qytaı, Iran, Belarýs, Portýgalııa, Venesýela jáne Ulybrıtanııa syndy 15 eldiń kompanııalary óz ónimderin usyndy. Ulybrıtanııa bıyl kórmege alǵash ret qatysyp otyr.
Kitap jármeńkesi elorda turǵyndary men qonaqtarynyń úlken qyzyǵýshylyǵyn týdyrdy. Osy kúnderi kórmege qala turǵyndary men týrıster – balalardan bastap eresekterge deıin belsendi qatysty. Olar ádebı jańalyqtarmen tanysyp, kitap satyp alyp, mazmundy mádenı baǵdarlamaǵa qatysty.
«Astana Eurasian Book Fair – 2026» baǵdarlamasy ondaǵan mádenı jáne iskerlik is-sharany qamtydy. Kórme aıasynda jańa kitaptardyń tusaýkeserleri, avtorlarmen kezdesýler, qoltańba sessııalary, arnaıy taqyryptardy talqylaý men sheberlik saǵattary ótti.
Balalar aýdıtorııasyna erekshe kóńil bólinip, jas oqyrmandar úshin ınteraktıvti formattaǵy arnaıy aımaqtar men damytýǵa arnalǵan sabaqtar uıymdastyryldy.
Óskeleń urpaq jármeńkeniń eń belsendi qatysýshylarynyń biri boldy. Olar úshin sheberlik sabaqtary, oıyn jáne tanymdyq baǵdarlamalar, sondaı-aq balalar ádebıetiniń avtorlarymen kezdesýler ótkizildi. Oqýshylardyń aıtýynsha, kórmede olar batyrlar týraly áńgimelerden bastap dınozavrlar jaıly basylymdarǵa deıin óz qyzyǵýshylyqtaryna saı kitaptar tapty, bul sapardy qyzyqty ári tanymdyq deńgeıde etti.
Eleýli oqıǵalardyń qatarynda qazaqstandyq jáne sheteldik avtorlardyń shyǵarmalarynyń, sondaı-aq kórkem, ǵylymı-kópshilik jáne balalar ádebıeti janrlaryndaǵy basylymdardyń tusaýkeserleri boldy. Budan bólek, fotoalbomdar, mádenıet pen tarıhqa arnalǵan kitaptar, sondaı-aq jastar arasynda kitap oqýdy nasıhattaýǵa baǵyttalǵan jobalar da erekshe qyzyǵýshylyq týdyrdy.
Kórme aıasyndaǵy mańyzdy is-sharalardyń biri – 23 sáýirde ótken Ulttyq kitap kúni. Bul kúni QR Mádenıet jáne aqparat mınıstrligi uıymdastyrǵan «Ulttyq kitap» respýblıkalyq baıqaýy jeńimpazdaryn marapattaý rásimi ótti.
Kórme kásibı ózara is-qımyl úshin de mańyzdy alańǵa aınaldy. Qatysýshylardyń aıtýynsha, mundaı is-sharalar halyqaralyq yntymaqtastyqty damytýǵa, tájirıbe almasýǵa jáne birlesken jobalardy júzege asyrýǵa yqpal etedi. Baspa ókilderiniń sózinshe, bıyl kelýshiler bilim berý jáne balalar ádebıetine erekshe qyzyǵýshylyq bildirdi.
Sonymen qatar kezdesýler men talqylaýlar barysynda qoǵamdyq mańyzy bar taqyryptar kóterildi. Spıkerler kitaptyń qoǵam mádenıetin, qundylyqtaryn jáne quqyqtyq sanasyn qalyptastyrýdaǵy rólin atap ótip, oqý arqyly jaýapkershilik, tártip jáne zańǵa qurmet sııaqty qasıetter damıtynyn aıtty.
Jyl saıyn «Astana Eurasian Book Fair» kórmesi óz geografııasyn keńeıtip, halyqaralyq alań retindegi mártebesin nyǵaıtyp keledi. Buryn bir elden bir ǵana baspa qatyssa, búginde olardyń sany edáýir artqan, bul Qazaqstannyń kitap naryǵyna degen qyzyǵýshylyǵynyń ósip kele jatqanyn kórsetedi.
Aıta keteıik, kórme 2016 jyldan beri ótkizilip keledi jáne osy ýaqyt ishinde eldiń mádenı ómiriniń mańyzdy bóligine aınaldy. 2020 jylǵy úziliske qaramastan, joba kásibı qaýymdastyq pen oqyrmandardyń basyn qosa otyryp, belsendi damyp keledi.
«Astana Eurasian Book Fair – 2026» halyqaralyq kitap kórme-jármeńkesi taǵy da bir márte Qazaqstanda kitap oqýǵa degen qyzyǵýshylyqtyń joǵary ekenin, al kitaptyń qoǵamnyń rýhanı jáne zııatkerlik damýynyń mańyzdy bóligi ekenin dáleldedi.
Buǵan deıin elordada halyqaralyq kitap kórmesi ótip jatqanyn habarlaǵanbyz.
