Astanadaǵy áskerı paradty qaıdan tamashalaýǵa bolady
ASTANA. KAZINFORM – Astanada Jeńistiń 80 jyldyǵy men Otan qorǵaýshy kúnine arnalǵan áskerı paradqa qyzý daıyndyq júrip jatyr. Bul shara 2025 jyldyń basty oqıǵalarynyń biri bolmaq. Merekelik sherý 7 mamyrda Astanadaǵy Táýelsizdik alańynda ótedi, dep habarlaıdy Kazinform agenttigi.
Saltanatty is-sharaǵa 4 000-nan astam áskerı qyzmetshi, 200-den astam áskerı tehnıka, sondaı-aq maıdandyq, armııalyq jáne áskerı-kóliktik avıatsııanyń 66 ushaǵy men tikushaǵy qatysady.
Qazaqstan Qarýly kúshteriniń kúsh-qýatyn aıshyqtaıtyn saltanatty sherý respýblıkalyq telearnalardan, elimizdiń barlyq qalasynda LED-ekrandardan, Qorǵanys mınıstrliginiń resmı YouTube-arnasynan tikeleı efırde kórsetiledi.
Aıta keteıik, Prezıdent Teleradıokesheniniń Jibek Joly telearnasynan áskerı paradty tikeleı efırde tamashalaýǵa bolady.
Bul kúnderi áskerı tehnıkanyń qaýipsiz júrýin qamtamasyz etý úshin birqatar kóshede ýaqytsha shekteýler engizilip, avtobýs baǵyttary ózgeredi, keıbir jaıaý júrginshiler ótkelderi jabylady.
Buǵan deıin Kazinform agenttigi dalalyq jaǵdaıda ómir súrip, aıtýly sharaǵa daıyndyqty pysyqtap jatqan áskerılerdiń tynys-tirshiligin kórsetken edi.