Astanadaǵy áskerı bólimde ata-analar sarbazdardyń turmysy jáne qyzmetimen tanysty
ASTANA. KAZINFORM — «Astana» óńirlik qolbasshylyǵynyń 31775 áskerı bóliminde merzimdi áskerı qyzmetshilerdiń ata-analaryna ashyq esik kúni ótti. Іs-shara áskerı-patrıottyq aktsııasy aıasynda uıymdastyryldy.
Bul Qarýly kúshterdiń ashyqtyǵyn arttyrýǵa jáne sarbazdardyń áskerı qyzmetti ótkerý jaıy týraly olardyń otbasylaryn aqparattandyrýǵa baǵyttaldy.
Áskerı bólim aýmaǵynyń kireberisinde ata-analardy óz uldary qarsy aldy. Sarbazdar týǵan-týystaryn bólim aýmaǵynda da ózderi ertip júrdi. Baǵdarlama Batyrlar alleıasynda gúl shoqtaryn qoıý rásiminen bastaldy. Ata-analarǵa Ekinshi dúnıejúzilik soǵys jyldarynda qurylǵan, ondaǵan jyldar boıy eldiń qorǵanys qabiletin nyǵaıtýǵa jáne Otan qorǵaýshylaryn tárbıeleýge úles qosyp kele jatqan áskerı bólimniń tarıhy tanystyryldy.
Qonaqtar uldary oqyp-jattyǵatyn qarý-jaraq pen áskerı tehnıkany kórdi. Bólimshe komandırleri jaýyngerlik daıarlyq protsesi týraly jan-jaqty aıtyp, oqý synyptaryn jáne jeke qurammen ótkiziletin sabaqtardyń túrlerin kórsetti.
Ata-analarǵa kazarmalardy aralaý erekshe qyzyǵýshylyq týdyrdy. Olar sarbazdardyń turmys jaǵdaıyn kórip, úı-jaılardyń tártibi men jabdyqtalýyn baǵalady. Áskerı qyzmetshilerdiń turmysyn jaıly etýge arnalǵan qosymsha múmkindik retinde zamanaýı tehnıkamen jabdyqtalǵan jańa monsha-kir jýý kesheni qyzmet etedi. Ata-analardyń kóbi áskerı qyzmet jaǵdaıy ózderiniń burynǵy túsinikterinen aıtarlyqtaı ózgeshe ekenin atap ótti.
Ekskýrsııadan keıin áskerı bólim basshylyǵymen kezdesý ótti. Ata-analar bólim basshylyǵyna, áskerı prokýrorǵa, odan basqa «Analar júregi» sarbazdar analary komıteti» RQB ókiline ózderin qyzyqtyrǵan suraqtardy qoıdy. Áńgime barysynda turmys, oqý-jattyǵý jáne áskerı qyzmetshilerdiń quqyqtarynyń saqtalýy máseleleri talqylandy.
— Biz úshin ata-analardyń qyzmet jaǵdaıyn óz kózderimen kórip, komandırlermen ashyq sóılesip, kez kelgen suraqty qoıa alýy asa mańyzdy. Ashyqtyq pen senim — jumysymyzdyń negizi. Árbir sarbaz biz úshin bir úıdiń balasy, biz onyń qaýipsizdigine, daıyndyǵyna jáne laıyqty qyzmet jaǵdaıyna jaýaptymyz, — dep atap ótti «Astana» óńirlik qolbasshylyǵy áskerleriniń qolbasshysy polkovnık Mahsýt Gýseınov.
Ashyq esik kúni sarbazdar ashanasynda birge túski as ishýmen aıaqtaldy. Ata-analar ásker taǵamynan dám tatyp, uldarymen beıresmı jaǵdaıda ýaqyt ótkize aldy.
— Jańa jyl qarsańyndaǵy bul kezdesý bizge keremet syı boldy. Barlyǵyn óz kózimizben kórip, sarbazdardyń jaqsy jaǵdaıda turyp jatqanyn, barlyǵy jetkilikti qamtamasyz etilgenin bildik. Osyndaı múmkindik jasaǵan bólim basshylyǵyna úlken rahmet, — dedi sarbazdyń anasy Gúldana Janalına.
Ashyq esik kúniniń ótkizilýi armııa men qoǵam arasyndaǵy senimdi nyǵaıtýdyń mańyzdy qadamy boldy. Mundaı is-sharalar ata-analarǵa balalarynyń laıyqty jaǵdaıda qyzmet ótkerip jatqandyǵyna, al daıarlyqty tájirıbeli ári senimdi komandırler júrgizip otyrǵanyna kóz jetkizýge múmkindik beredi.
Aıta ketelik Erlan Qarın áskerı-patrıottyq tárbıe jónindegi jumysty kúsheıtýdi tapsyrǵan edi.