Qazaqstandyq jelaıaq Ortalyq Azııa chempıonatynda eki altyn jeńip aldy
ASTANA. KAZINFORM — Tashkentte ótip jatqan jeńil atletıkadan III Ortalyq Azııa chempıonatynda el namysyn qorǵaǵan elordalyq sportshy Vıktorııa An ekinshi altyn júldesin jeńip aldy. Bul týraly Astana qalasynyń ákimdigi málim etti.
Qazaqstandyq atlet 100 metrge júgirýde márege birinshi bolyp jetip, chempıon atandy. Vıktorııa qashyqtyqty 11,85 sekýndta eńserip, osy maýsymdaǵy úzdik nátıjesin tirkedi.
Ekinshi oryndy Ózbekstan ókili Laılo Allaberganova 11,92 sekýnd nátıjemen ıelense, úzdik úshtikti Túrikmenstan sportshysy Valentına Meredova 12,09 sekýnd kórsetkishpen túıindedi.
Aıta keteıik, bir kún buryn Vıktorııa An 200 metrge júgirýde de top jaryp, altyn júldeni jeńip alǵan bolatyn. Ol atalǵan qashyqtyqty 24,05 sekýndta baǵyndyryp, jeńis tuǵyrynyń eń bıik satysyna kóterildi.
Osylaısha, Vıktorııa An III Ortalyq Azııa chempıonatynda 100 jáne 200 metr qashyqtyqtarda jeńiske jetip, jarystyń eki dúrkin chempıony atandy.
Sonymen qatar 200 metrdegi 24,05 sekýndtyq nátıje Vıktorııa Anǵa Japonııada ótetin XX Azııa oıyndaryna qatysýǵa múmkindik beredi.
