Astanadaǵy alyp saǵattyń jabdyqtaryn urlaǵandar tabylmaı jatyr

ASTANA. KAZINFORM –  2019 jyldan beri Esil jaǵalaýyndaǵy alyp saǵat jumys istemeı tur. Onyń toqtaý sebebi – saǵattyń energııamen jabdyqtaý kabelderi men basqa da kerek-jaraqtaryn urlap ketken.

Polıtsııa departamentiniń habarlaýynsha, qylmystyq isti «Esil» aýdanynyń basqarmasy QR Qylmystyq kodeksiniń 188-baby boıynsha «Jastar saraıy» dırektorynyń ótinishi negizinde qozǵaǵan.

«Sotqa deıingi tergep-tekserý nátıjesi boıynsha qylmystyq is júrgizý QR Qylmystyq-protsestik kodeksiniń 45-baby 7-bóligi 1-tarmaǵynyń negizinde, ıaǵnı qylmys jasaǵan adamnyń tabylmaǵany úshin toqtatyldy. Bul sheshim Astana qalasynyń «Esil» aýdanynyń prokýratýrasymen kelisildi. Sonymen qatar kúdikti adamdy anyqtaý boıynsha jedel-izdestirý is - sharalary jalǵasyp jatyr», - delingen qalalyq polıtsııanyń Kazinform agenttiginiń saýalyna bergen jaýabynda.

Óz kezeginde qalalyq Ýrbanıstıka ortalyǵy tehnıkalyq zertteý júrgizý jáne sýburqaqty iske qosý úshin jeke kompanııalardy tartý máselesin qarastyrǵanyn habarlady.

Eske sala keteıik, byltyr kúzde Astanadaǵy alyp saǵattyń nege jumys istemeıtini týraly jazǵan edik. 

Aıta ketsek, «Alyp saǵat» dızaıny - sý aǵyny arqyly lazerlik shoýdy taratýǵa arnalǵan ekran retindegi sýburqaqtyń bir túri. Onyń qurylysy 2016 jyly «Sý ekstravaganzasy» (dızaın jobasy) is-sharasyn daıyndaý jáne ótkizý úshin satyp alyndy.