Astanadaǵy álem kýbogy: Sanjar Táshkenbaı japonııalyq boksshydan basym tústi

ASTANA. KAZINFORM - Astanada ótip jatqan World Boxing aıasyndaǵy álem kýbogynda Qazaqstan quramasynyń boksshysy Sanjar Táshkenbaı alǵashqy aıqasynda jeńiske jetti. 

Otandasymyz japonııalyq Shodaı Kotomen qolǵap túıistirdi. Jekpe-jek barysynda ár raýnd saıyn Sanjardyń basymdyǵy aıqyn baıqalyp turdy. Tóreshiler de Táshkenbaıdyń jeńisine esh shúbá keltirgen joq. Osylaısha ol qarsylasynan basym túsip, jarysty jalǵastyrýǵa múmkindik aldy.

Sanjar 2023 jylǵy álem chempıonatynda top jardy. Sonyń arqasynda el tarıhynda álem chempıony ataǵyna qol jetkizgen eń jas sportshy atandy. Sonymen qatar 2022 jyly Azııa chempıonatynda altyn, 2024 jyly kúmis júldege ıe boldy.

Qazirge deıin el quramasynan búgin, 2 shildede Nazym Qyzaıbaı (48 keli), Alýa Balqybekova (51 keli) jarys jalǵastyrýǵa múmkindik aldy. Sondaı-aq erlerden Bekzad Nurdáýletov (85 keli) sharshy alańǵa shyǵady.

Al keshki sessııada Vıktorııa Grafeeva (60 keli), Aıda Abıkeeva (65 keli), Ertýǵan Zeınýllınov (65 keli), Saǵyndyk Toǵambaı ( 90 keli) saıysqa túsedi.