Astanadaǵy álem chempıonatyna júzden astam elden 1000-nan astam balýan keledi
ASTANA. KAZINFORM — Astanada ótetin kúres túrlerinen álem chempıonatyna júzden astam elden 1000-nan astam balýan qatysady. Bul týraly Ortalyq kommýnıkatsııalar qyzmetinde ótken baspasóz brıfınginde QR Týrızm jáne sport vıtse-mınıstri Serik Jarasbaev málim etti.
— Kúres túrlerinen eresekter arasyndaǵy álem chempıonaty 2026 jylǵy 24 qazan men 1 qarasha aralyǵynda Astanadaǵy Barys Arena sport kesheninde ótedi. Bıyl bul jarysqa álemniń júzden astam elinen myńǵa jýyq sportshy álem chempıony ataǵy úshin baq synaıdy. Atap aıtqanda grek-rım kúresi boıynsha 10 salmaq dárejesinde, áıelder kúresi boıynsha 10 salmaq dárejesinde jáne erkin kúres boıynsha 10 salmaq dárejesinde balýandar beldesedi, — dedi Serik Jarasbaev.
Vıtse-mınıstrdiń aıtýynsha, Qazaqstannyń álemdik deńgeıdegi iri sporttyq jarysty qabyldaýy eldiń sporttyq áleýetin kóteredi.
— Mundaı iri sporttyq sharany ótkizý, eń aldymen, elimizdiń sporttyq áleýetin, sondaı-aq halyqaralyq deńgeıdegi jarystardy uıymdastyrý múmkindigin kórsetedi. Bul sheshim mamyr aıynda qabyldanyp, biz Astanada kúres túrlerinen álem chempıonatyn ótkizý quqyǵyna ıe boldyq, — dedi ol.
Qazirgi ýaqytta chempıonatty ótkizýge daıyndyq birneshe baǵyt boıynsha júrgizilip jatyr. Mınıstrlik, Qazaqstan kúres federatsııasy jáne Astana qalasynyń ákimdigi birlesip jumys josparyn ázirlep, uıymdastyrý komıtetin bekitken.
— UWW-nyń tehnıkalyq delegatsııasy Astanaǵa kelip, sport nysandarynyń daıyndyǵyna jáne olardyń múmkindigine óz baǵasyn berdi. Qazir barlyq baǵyt boıynsha aýqymdy jumys júrgizilip jatyr, — dedi vıtse-mınıstr.
Onyń aıtýynsha, basty nazar sport nysandarynyń halyqaralyq talaptarǵa sáıkestigine, sportshylar men kórermenderge qolaıly jaǵdaı jasaýǵa jáne jarys ótetin alańdardyń tolyq daıyndyǵyn qamtamasyz etýge aýdarylyp otyr.
Eske sala keteıik, Astana eresekter arasyndaǵy kúres túrlerinen álem chempıonatyn jeti jyldan keıin qaıta qabyldaıdy. Buǵan deıin elordada álemdik doda 2019 jyly ótken bolatyn.
