Astanadaǵy «Alash» pen «Sharyn» bazarlarynda sanıtarlyq talaptar saqtalmaı otyr

ASTANA. KAZINFORM – Astana qalalyq máslıhat depýtattary qoǵamdyq tyńdaýlar qarsańynda elordanyń birqatar bazarlaryn aralap, olardyń qazirgi ahýalyn baǵalady.

Aralaý barysynda áleýmettik mańyzy bar azyq-túlik taýarlaryna turaqty baǵany qamtamasyz etýge daıyndyq deńgeıine nazar aýdaryldy.

Tekserý nátıjesinde belgili bolǵandaı, «Alash» pen «Sharyn» bazarlary zaman talabyna saı jańǵyrtylmaǵan. Sýmen jabdyqtaý jáne káriz júıeleri joq, sanıtarlyq talaptar saqtalmaıdy. Saýdagerlerge qolaıly jaǵdaı jasalmaǵan. Órt qaýipsizdigi talaptaryna sáıkes kelmeıdi, órt sóndirý gıdranttary qarastyrylmaǵan. Kelýshiler úshin avtoturaq qarastyrylmaǵan, al bazar aýmaǵynda kólik qozǵalysy rettelmegen.

Central Market kıim-keshek bazary tolyq jańǵyrtylyp, sanıtarlyq jáne órt qaýipsizdigi normalaryna sáıkes. Alaıda aýlasynda talapqa saı emes konteınerlik saýda oryndary bar.

«Álem» jáne «Saryarqa» bazarlary burynǵy «Tselınselmash» zaýytynyń ǵımaratynda ornalasqan. «Álem» bazary jańǵyrtýdan ótip, eki qabatqa bólingen, talapqa saı modernızatsııa jasalǵan.

Al «Saryarqa» bazaryna dál osyndaı jóndeý jumystary qajet.

«Kóktal» fermerlik bazary zamanaýı formatta boı kóterip, tolyq jabdyqtalǵan. Tipti kınoteatrǵa deıin qarastyrylǵan.

«Uljan» bazary beıbereket saýda orny bolyp sanalady. Munda jańǵyrtý bastalmaǵan, sanıtarlyq jáne órt qaýipsizdigi normalary saqtalmaǵan, satýshylar úshin qolaıly jaǵdaı jasalmaǵan.

Sonymen qatar áleýmettik mańyzy bar azyq-túlik taýarlaryn satý máselesi qozǵalyp, baǵa saıasatyn baqylaýdy kúsheıtý tapsyryldy.

Eske salsaq, 18 shildede Astanada «Bıg Shanhaı» úsh qabatty bazary órtke orandy.