Astanadaǵy «Alash qaıratkerleri» eskertkishine gúl shoqtaryn qoıý rásimi ótti
ASTANA. KAZINFORM — 5 qyrkúıek – qazaq halqynyń taǵdyry men tili úshin kúresken Alash arysy, ult ustazy, qazaq ǵylymy men mádenıetiniń shamshyraǵy Ahmet Baıtursynulynyń týǵan kúni. Bıyl kórnekti aǵartýshy, ǵalym, qoǵam qaıratkeriniń týǵanyna 153 jyl tolyp otyr. Sonymen birge bul kún elimizde Qazaqstan halqy tilderi kúni retinde atap ótiledi.
Osyǵan oraı, Astanadaǵy Qalamgerler alleıasynda ornalasqan «Alash qaıratkerleri» eskertkishine gúl shoqtaryn qoıý rásimi ótti.
Іs-sharaǵa jazýshy, fılologııa ǵylymdarynyń doktory, alashtanýshy Tursyn Jurtbaı, Astana qalasynyń Tilderdi damytý jáne arhıv isi basqarmasynyń basshysy Sáken Esirkep, Qoǵamdyq keńestiń tóraǵasy Zulfuhar Ǵaıypov, QR Jazýshylar odaǵynyń Astana qalalyq fılıalynyń dırektory Baýyrjan Babajanuly bastaǵan zııaly qaýym ókilderi, memleket jáne qoǵam qaıratkerleri, qala turǵyndary men qonaqtary, jastar qatysty.
— Zııaly adam ataýly eń aldymen óz tegine, óz halqyna qaryzdar. Ahmet Baıtursynuly da ómir boıy qazaq ulty úshin qyzmet etip, «men halqymnyń aldynda qaryzdarmyn» dep ótken tulǵa. Alaıda ultty alǵa súıreıtin, damytatyn — osyndaı uly perzentter. Meniń oıymsha, kerisinshe, qazaq halqy men qazaq tili Ahań aldynda qaryzdar. Óıtkeni 1911 jylǵa deıingi qazaqtyń sóıleý, jazý, oılaý máneri men odan keıingi kezeńdi salystyrsaq, arasy jer men kókteı. Ahań qazaqtyń oılaý júıesin bir izge túsirip, sóz mádenıetin qalyptastyryp, ulttyq sanany jańa deńgeıge kóterdi. Ol qazaqtyń tilin, jazýyn ǵana emes, tutas dúnıetanymyn júıelep, halyqtyń rýhanı ımanyn uıytqan uly ustaz boldy, — deıdi gúl qoıýǵa kelgen alashtanýshy Tursyn Jurtbaı.
Ahmet Baıtursynuly — qazaq til bilimi men ádebıettaný ǵylymynyń negizin salýshy, ulttyq sanany oıatqan aǵartýshy, Alash qozǵalysynyń jetekshisi. Onyń murasy — eldik pen birliktiń, rýhanı táýelsizdiktiń máńgilik temirqazyǵy.
Eske sala keteıik, buǵan deıin Astanada Ahmet Baıtursynuly men Maǵjan Jumabaevtyń jınaqtary tanystyrylǵan edi.